कोरोनाभाइरस नियन्त्रणका लागि बुधबार राति १२ बजेबाट मेचीनगर नगरपालिका एक हप्ता सिल गरिने भएको छ।
मंगलबार बसेको नगर कार्यपालिका बैठकबाट साउन १३ गते राति १२ बजेदेखि साउन १९ गते मध्यराति १२ बजेसम्म मेचीनगर नगरपालिका क्षेत्र सिल गर्ने निर्णय भएको हो।
कोरोना भाइरस संक्रमण जोखिम बढेसँगै नगरपालिकामा सोमबार बसेको कोभिड-१९ संक्रमण नियन्त्रण समितिको बैठकले कम्तीमा एक हप्ताका नगर सिल गर्ने प्रस्ताव गरेको थियो।
कार्यपालिकाको बैठकले समितिको सोही प्रस्तावको कार्यान्वयन गर्दै नगरपालिका अत्यावश्यक केही सेवाबाहेक सम्पूर्ण क्षेत्र बन्दाबन्दी गर्ने निर्णय गरेको मेचीनगर कार्यबाहक प्रमुख मीना उप्रेतीले जानकारी दिइन्।
सिल अवधिमा अस्पताल, स्वास्थ्य चौकी, एम्बुलेन्स, वारुणयन्त्र, औषधी पसल, खोप सेवा, फोहोरमैला व्यवस्थापन, विद्युत तथा सञ्चारसम्बन्धी सेवामात्र सञ्चालनमा आउने छन्।
त्यस्तै, दूध, अण्डा, फलफूल, तरकारी पसल बिहान ६ बजेदेखि ८ बजेसम्म खुला गर्न दिने निर्णय भएको छ।
नगरभित्र सञ्चालनमा आउने कक्षा ११ को परीक्षा स्वास्थ्य मापदण्डको पालना गरी सञ्चालन गर्न दिइने छ। अन्य पसल, व्यवसाय, होटल, बैंक तथा बित्तीय संस्था समेत पूर्णरूपमा बन्द रहने छन्।
कार्यपालिकाको बैठकले कोभिड-१९ को बढ्दो संक्रमणलाई मध्यनजर गर्दै पिसिआर तथा एन्टिजेन परीक्षणको दायरा बढाइने कार्यपालिको बैठकपछि आयोजित पत्रकार भेटघाटको अवसरमा जानकारी गराइएको छ।
साथै नगरपालिका तथा वडा कार्यालयहरूबाट प्रदान अत्यावश्यक बाहेकका अन्य सेवा समेत बन्द रहनेछन्। झापामा हालसम्म ७ पालिकाले सिल गर्ने निर्णय गरिसकेका छन्।
झापाका बुद्धशान्ति, अर्जुनधाराको शनिश्चरे बजार, कनकाई, दमक र शिवसताक्षी यसअघिनै सिल गरिएका छन्।
त्यस्तै, संक्रमण नियन्त्रणका लागि भन्दै गौरादह नगरपालिकाले मंगलबारदेखि विर्तामोड नगरपालिकाले समेत साउन १३ गते बुधबार राति १२ बजेदेखि नगरपालिका सिल गर्ने निर्णय गरेको छ।
