नेपाली राष्ट्रिय क्रिकेट टिमका ओपनर कुशल भुर्तेल अन्तर्राष्ट्रिय क्रिकेट काउन्सिल (आइसिसी) को टी-२० ब्याट्सम्यानको वरीयतामा ३२ स्थान माथि उक्लिएका छन्।
गत साता पहिलो पटक टी-२० ब्याटिङको वरीयतामा परेका कुशल ९३औं स्थानमा थिए।
यो साता कुशल ३२ स्थान माथि उक्लदै ६१औं स्थानमा आइपुगेका छन्। कुशलले गत साता सकिएको नेपाल, मलेसिया र नेदरल्यान्ड्सबीचको त्रिकोणात्मक टी-२० सिरिजमा पाँच खेल खेल्दा चार अर्धशतक प्रहार गरेका छन्।
उनले पाँच खेलमा २७८ रन प्रहार गरेका थिए। नेदरल्यान्डविरुद्धको फाइनलमा उनले ७७ रन प्रहार गरे। समूह चरणमा पनि उनले नेदरल्यान्ड्सविरुद्धका दुवै खेलमा अर्धशतक हिर्काएका थिए।
पहिलो खेलमा ६२ रन हिर्काउदा दोस्रो खेलमा पनि उनले ६२ रन नै प्रहार गरेका थिए। मलेसियाविरुद्ध पहिलो खेलमा नटआउट ६१ रन हिर्काएका उनले दोस्रो खेलमा १६ रनमा आउट भएका थिए।
यता नेपालका उपकप्तान दीपेन्द्रसिंहले पनि वरीयतामा फड्को मारेका छन्। आइसिसीका अनुसार उनी ५६ स्थान माथि उक्लदै १०८औं वरीयतामा आइपुगेका छन्।
ब्याटिङ वरीयतामा नेपालका पारस खड्का ८८औं स्थान र कप्तान ज्ञानेन्द्र मल्ल ९४औं स्थानमा छन्।
शीर्ष स्थानमा इंग्ल्यान्डका डेभिड मलान र दोस्रो स्थानमा अस्ट्रेलियाका आरोन फिन्च छन्।
यस्तै टी-२० बलिङ वरीयतामा सन्दीप लामिछाने ७७औं स्थानमा छन्।
नेपालले टी-२० वरीयतामा पनि सुधार ल्याएको छ। नेपाल टी-२० वरीयतामा १४औं स्थानमा छ।
