अष्ट्रेलियामा जारी आईसीसी पुरूष टी-२० विश्वकपको फाइनल प्रवेशका लागि पाकिस्तानले न्यूजिल्याण्डबाट १५३ रनको लक्ष्य पाएको छ।
टस जितेर पहिले ब्याटिङ गरेको न्यूजिल्याण्डले निर्धारित २० ओभरमा ४ विकेट गुमाउँदै १५२ रन बनायो।
उसका लागि ड्यारेल मिचेलले सर्वाधिक ५३ रन बनाए। उनले ३५ बलमा १ छक्का र ३ चौका प्रहार गरे।
यस्तै कप्तान केन विलियम्सनले ४६ रन जोडे। ४२ बल खेलेका उनले १ छक्का र १ चौका प्रहार गरेका थिए।
फिन आलेनले ४ रन बनाउँदा ग्लिन फिलिप्सले ६ रन जोडे। यस्तै जामेश निसामले १२ बलमा १६ रन बनाए।
पाकिस्तानका लागि शहिन साह अफ्रिदीले २ तथा मोहम्मद नवाजले १ विकेट लिए।
भाग्यले साथ दिएको पाकिस्तान १३ वर्षपछि फाइनल पुग्ला?
भाग्यको साथ पाएको पाकिस्तान १३ वर्षपछि पुनः टी-२० विश्वकपको फाइनल नजिक छ।
जारी विश्वकपको सबैभन्दा भाग्यमानी टोली पाकिस्तान सुरूआती दुई खेलमा पराजित भएपछि लगभग सेमिफाइनल दौडबाट बाहिरिएको थियो।
पहिलो खेलमा भारतसँग चार विकेट र दोस्रो खेलमा जिम्बावेसँग १ रनले पराजित भएपछि पाकिस्तानको तिब्र आलोचनासमेत भएको थियो। यसरी सुपर १२ बाट आउट हुनै लागेको पाकिस्तानले अविश्वसनीय पुनरागमन गर्दै सेमिफाइनलमा स्थान पक्का गर्यो।
त्यसो त पाकिस्तानको यो पुनरागमनमा उसको आफ्नै खेल मात्र नभएर नेदरल्यान्डसको महत्वपूर्ण भूमिका रह्यो। नेदरल्यान्डले दक्षिण अफ्रिकाविरूद्ध स्तब्ध नतिजा ननिकालेको भए पाकिस्तानले कराँचीको टिकट काटिसक्नुपर्थ्यो। तर अन्तिम खेलमा दक्षिण अफ्रिका नेदरल्यान्ड्ससँग १३ रनले स्तब्ध भएपछि पाकिस्तान नाटकीय रुपमा सेमिफाइनलमा पुग्यो।
निकै भाग्यमानी मानिएको पाकिस्तान सन् २००९ को विश्वकपपछि पहिलो पटक फाइनल खेल्ने तयारीमा छ।
पाकिस्तानले २००९ को विश्वकपमा श्रीलंकालाई ८ विकेटले हराउँदै विश्वकप ट्रफी उचालेको थियो। त्यसपछि पाकिस्तान लगातार पाँचौ पटक फाइनलमा पुग्न सकेको छैन।
त्यसअघि सन् २००७ मा दक्षिण अफ्रिकामा भएको पहिलो संस्करणको फाइनलमा पनि पाकिस्तान भारतसँग पाँच रनले पराजित भएको थियो।
सन् २०१० को टी२० विश्वकपको सेमिफाइनलमा अष्ट्रेलियासँग तीन विकेटले पराजित भएको पाकिस्तानले गतवर्षको विश्वकपमा पनि अष्ट्रेलियासँग ५ विकेटले सेमिफाइनलमै पराजित भएर बाहिरिएको थियो।
यस्तै न्यूजिल्याण्ड समूह एकको विजेता हुँदै सेमिफाइनलमा पुगेको टोली हो। सुपर १२ मा इङ्ल्याण्डसँग मात्र पराजित भएको न्यूजिल्याण्डले ५ मध्ये ३ खेलमा जित निकालेको छ भने अफगानिस्तानसँग अंक बाँडेको थियो।
न्यूजिल्याण्ड, इङ्ल्याण्ड र अष्ट्रेलियाको समान ७-७ अंक भए पनि राम्रो रन रेटका आधारमा न्यूजिल्याण्ड समूह विजेता भएर सेमिफाइनलमा प्रवेश गरेको हो।
पाकिस्तान र न्युजिल्यान्डबीच हालसम्म २८ टी-२० अन्तर्राष्ट्रिय खेल भएका छन्। जसमध्ये पाकिस्तान १७ र न्युजिल्यान्ड ११ खेलमा विजयी भएका छन्।
यी दुई देशबीच भएका पछिल्ला पाँच खेलमध्ये पाकिस्तान चार खेलमा विजयी भएको छ।
