सिरो इमोबिलले युरोपियन गोल्डेन सु र इटालियन सिरि ए गोल्डेन बुट जितेका छन्।
सिजनको इटालियन लिगमा ३६ गोल गर्दै लाजियोका ३० वर्षीय फरवार्ड सिरो युरोपियन घरेलु लिग मध्येमा सर्वाधिक गोलकर्ता भए। यस्तै उनले सिरि एमा एकै सिजनमा बढी गर्ने गोन्जालो हिग्युइन (३६ गोल)को रेकर्ड पनि बराबरी गरे।
लिगको अन्तिम दिन उनको टिम लाजियो नापोलीसँग ३-१ले पराजित भए पनि सिरो व्यक्तिगत रूपमा सफल भए। उनले २२ मिनेटमा सिजनको ३६औं गोल गरे। सिजनमा लाजियो चौथो भयो।
युरोपियन लिगहरूमा इटालियन फरवार्ड सिरोले जर्मन च्याम्पियन वायर्न म्युनिखका रोवर्ट लेवान्डोस्कीलाई २ गोलले पछि परे। लेवान्डोस्कीले सिजनमा ३४ गोल गरेका थिए।
इटालियन च्याम्पियन युभेन्ट्सका स्टार स्ट्राइकर क्रिस्टियानो रोनाल्डो तेस्रो बने। उनले सिजनमा ३१ गोल गरे।
लगातार तीन सिजन युरोपियन गोल्डेन सु जितेका बार्सिलोनाका फरवार्ड लिओनल मेसीले यो सिजन २५ गोल मात्र गर्न सके।
सिरि एमा सिरोले गोल्डेन बुट जितेको तेस्रोपटक हो। उनले २०१४ मा २२ गोलका साथ पहिलोपटक बुट जितेका थिए। यस्तै २०१८ मा उनले २९ गोल गर्दा माउरो इकर्डीसँग संयुक्तरूपमा बुट जितेका थिए।
उनी युरोपियन सु जित्ने तेस्राे इटालियन लिगका खेलाडी हुन्। यसअघि रोमाका टोटी (२६ गोल) ले २००७ मा र फ्लोरेन्टिनाका लुका टोनी (३१ गोल) ले २००६ मा युरोपियन सु जितेका थिए।
सिरोले इटालीको राष्ट्रिय टिमका लागि ३९ खेलमा १० गोल गरेका छन्। इटाली सन् २०१८ को विश्वकपमा छनोट नहुनु जीवकै दुखद् क्षण मान्छन् उनी।
युभेन्ट्सबाट सन् २००९ मा करिअर सुरु गरेका उनले सो सिजनमा तीन खेलमा मात्र मौका पाए।
त्यसपछि उनी दोस्रो डिभिजनका क्लबमा लोनमा पठाइए।
२०१२ मा उनी लोनमा दोस्रो डिभिजनको पेस्कारामा गए। जहाँ उनले ३३ खेलमा २२ गोल गरे।
त्यसपछि उनी जिनेआमा आबद्ध भए पनि चल्न सकेनन्।
सन् २०१३ मा अर्को इटालियन क्लब टोरिनो उनले उनले उत्कृष्ट खेले। ३३ खेलमा २२ गोल गरेका उनी घरेलु सिजनको सर्वाधिक गोलकर्ता बने।
फलस्वरूप उनी १८ मिलियन युरोमा जर्मन क्लब बोरूसिया डर्टमुन्डमा सन् २०१४ मा आबद्ध भए। तर उनले सो सिजन २४ खेलमा ३ गोल मात्र गर्न सके।
त्यसपछि उनले दुई सिजन स्पेनिस क्लब सेभिल्ला तथा एक सिजन टोरिनोमा लोनमा बिताए।
सन् २०१६ मा उनी र लाजियोबीच सम्झौता भयो। जहाँ उनले आफ्नो क्षमता देखाए। उनले अहिलेसम्म क्लबका लागि १४१ खेलमा १०२ गोल गरिसकेका छन्।
