पछिल्लो समय सवारीसाधनको बिक्री घटेको छ। नेपाल राष्ट्र बैंकले हायर पर्चेज कर्जामा कडाई गरेसँगै सवारी साधनको व्यापारमा कमी आएको व्यवसायीको आरोप छ।
राष्ट्र बैंकले पुस पहिलो साता ऋणीले लिने कर्जाको भुक्तानी अर्थात किस्ता रकम कर तिरेको आम्दानीको ५० प्रतिशत भन्दा बढी हुन नहुनेगरी व्यवस्था गर्न बैंकहरुलाई निर्देशन दिएको थियो।
त्यसको असर सवारीसाधन क्षेत्रमा परिसकेको व्यवसायी बताउँछन्। गत वर्षको तुलनामा अहिले सवारीसाधनको विक्री २० प्रतिशतले घटेको नाडा अटोमोबाईल्स एसोसिएसनका अध्यक्ष कृष्णप्रसाद दुलालले जानकारी दिए। उनले पछिल्लो समय नाडा अटो शोमा बुकिङ भएका सवारी साधन डेलिभरी गर्न समेत नसकिएको बताए।
राष्ट्र बैंकको पछिल्लो निर्देशनले अटोमोबाइल क्षेत्रमा झनै सुस्तता आउने उनको भनाइ छ। उनले भने ‘गाडी छन्, ग्राहक पनि छन तर बीचमा मध्यस्थता गर्ने बैंकहरुले कर्जा नदिँदा समस्या आएको छ।’
नेपाल राष्ट्र बैंकले भने ऋण लिएपछि तिर्ने क्षमतामा सुनिश्चितता कायम गर्न यस्तो नीति लागू गरेको जनाएको छ। राष्ट्र बैंकका कार्यकारी निर्देशक तथा प्रवक्ता डा. गुणाकर भट्टले हायर पर्चेज, घरजग्गा लगायतका क्षेत्रमा दिइने कर्जामा आफ्नो कर चुक्ता भएको आम्दानीको ५० प्रतिशतबाट किस्ता तिर्न भ्याउने गरी कर्जा प्रवाह गर्ने व्यवस्था गरिएको र यसले कर्जा लिने व्यक्तिले भविष्यमा तिर्न नसक्ने अवस्थाको अन्त्य हुने बताए।
उनले सवारी साधनको व्यवसायमा सुरुमा समस्या देखिए पनि भविष्यमा राम्रो फाइदा पुग्ने बताए। अर्थतन्त्रमा राम्रो स्थिति बसाल्न र संस्थागत सुधार गर्न खोज्दा सुरुसुरुमा समस्या आउने तर पछि समान्य हुने भएकाले यसले दिर्घकालमा कुनै असर नगर्ने उनको भनाई छ।
व्यवसायीहरुले चालु आर्थिक वर्षमा सवारी साधनको विक्री घटेको र राष्ट्र बैंकले पछिल्लो समय लागू गरेको व्यवस्थाका कारण अभैm व्यापार घट्ने बताएका छन्। यसले समग्र अर्थतन्त्रमा असर पार्ने नाडाका अध्यक्ष दुलालले बताए।
राष्ट्र बैंकको तथ्याङ्कअनुसार सवारीसाधनको आयात नै घटेको छ। यस आर्थिक वर्षको साउनदेखि कात्तिकसम्म सवारीसाधनको आयात गत वर्षको सोही अवधिको तुलनामा १६ प्रतिशतले घटेको छ।
