लगानीकर्ताको दवावपछि पुँजी बजार सुधारका लागि धितोपत्र बोर्डले चासो देखाएको छ।
पुँजी बजार सुधारका लागि नियामक निकायले कुनै काम नगरेको भन्दै लगानीकर्ताले यसअघि धितोपत्र बोर्ड र नेप्से घेरेका थिए। साथै दवाव समूह बनाई लगानीकर्ताको समूहले आइतबारदेखि सरकारविरुद्ध रिले अनसन थाल्ने चेतावनी दिएको छ।
लगानीकर्ताको चेतावनीसँगै धितोपत्र बोर्डले मार्केट डिलर भित्र्याउनका लागि चासो देखाएको हो। बिहीबार बोर्डले मार्केट डिलर भित्र्याउनका लागि अहिलेको नेप्सेको संयन्त्रले साथ दिने/नदिने र डिलरको कारोबार प्रक्रियाबारे स्पष्ट जवाफ दिन भनेको छ।
बोर्डले तीन वर्षअघि नै नागरिक लगानी कोषलाई मार्केट डिलरको रुपमा विकास गर्ने योजना बनाए पनि नेप्से संयन्त्रले साथ नदिँदा रोकिएको थियो।
‘अहिलेको प्रणालीबाट मार्केट डिलरले कारोबार गर्ने प्रक्रियाका सम्वन्धमा नेप्सेसित जवाफ मागेका छौँ’ बोर्डका कार्यकारी निर्देशन निरज गिरीले सेतोपाटीसँग भने ‘नेप्सेको स्पष्ट जवाफपछि मार्केट डिलर ल्याउने काम अघि बढ्छ।’
नागरिक लगानी कोषले समेत सहायक कम्पनीमार्फत मार्केट डिलरको रुपमा काम गर्ने प्रतिबद्धता जनाइसकेको छ। ‘मार्केट डिलर भइसकेपछि पुँजी बजारको स्थायित्वमा टेवा पुग्छ, सहायक कम्पनी बनाई सोमार्फत कोषले मार्केट डिलरको रुपमा काम गर्न सक्षम हुनेछ’ कोषका कार्यकारी प्रमुख रमण नेपालले भने।
मार्केट डिलरले सेयर बजार घट्दा पर्याप्त मात्रामा सेयर खरिद गर्ने र बढ्दा बेच्ने भएकाले आपूर्ति सन्तुलनमा आउने कोषको भनाइ छ।
नेप्सेले कात्तिक २० गतेदेखि नयाँ अनलाइन प्रणालीमार्फत सेयर कारोबार थालेको छ। सो प्रणालीले मार्केट डिलरलाई सपोर्ट गर्ने नेप्सेको दावी छ। तर कसरी कारोबार गराउने भन्ने सम्वन्धमा भने दुवै पक्षले कुनै पहल गरेका छैनन्।
नियामकले पहल नगर्ने र अर्कोतिर सम्पत्ति गुम्दै जाँदा लगानीकर्ता सरकारप्रति आक्रोशित बनेका छन्। अर्थमन्त्रीको राजीनामा माग्दै उनीहरुले आगामी आइतबार नेप्सेमा अनसन बस्ने चेतावनी दिएका छन्।
