धितोपत्र बोर्डले रसुवागढी र सान्जेनको सेयर भर्ने समय थप्न सम्बद्ध बिक्री प्रवन्धकहरुलाई निर्देशन दिएको छ।
प्राथमिक सेयर भर्ने अनलाइन सिस्टममा समस्या भएपछि धेरै लगानीकर्ताले सेयर भर्न नपाएको भन्दै बोर्डमा गुनासो गरेका थिए।
सोही गुनासोलाई मध्यनजर गर्दै बोर्डले निर्देशन दिएको हो। अब १२ गतेसम्म लगानीकर्ताले सेयर भर्न सक्ने छन्। ‘लगानीकर्ताको गुनासोलाई मध्यनजर गर्र्दै अवधि थप्न भनेका हौँ’ बोर्डका प्रवक्ता निरज गिरीले भने।
छिटोमा आज मंगलबारसम्म सेयर भर्नका लागि अवधि तोकिएको थियो। माग गरिएभन्दा बढी आवेदन परेपछि बिक्री प्रवन्धकले आजैबाट निश्कासन बन्द गर्ने तयारी गरेका थिए।
प्राथमिक सेयर भर्नेमध्ये करिब ७० प्रतिशतले सिडिएस एण्ड क्लियरिङको अनलाइन ‘मेरो सेयर’मार्फत आवेदन दिने गरेका छन्। तर सिस्टममा समस्या आउँदा धेरै लगानीकर्ताले सेयर भर्न नपाएको भन्दै बोर्डमा गुनासो गरेका थिए।
अब सेयर भर्नेले सिडिएससीको सिस्टमले काम नगरे पनि आफ्नो बैंक खाता भएको शाखामार्फत भौतिक फारम भरेर आवेदन दिन सक्ने छन्।
यो पनि पढ्नुहोस्- प्राथमिक बजारमा सेयर ओइरिँदा सिस्टममा समस्या, भर्न पाएनन् लगानीकर्ता
