सिभिल बैंकले मर्जरमा जानको लागि आफ्नो पहिलो प्राथमिकतामा पहिलो पुस्ताका बैंक रहेको बताएको छ।
बैंकले आइएसओ मान्यता पाएको जानकारी दिन आयोजित पत्रकार सम्मेलनमा बोल्दै सिभिल बैंकका अध्यक्ष इच्छाराज तामाङले आफ्नो पहिलो प्रथमिकतामा पहिलो पुस्ताका बैंक भएको बताएका हुन्।
‘हाम्रो उत्साह फस्ट जेनेरेसनका बैंकमा छ,’ तामाङले भने, ‘त्यसमा भएन भने सेकेन्ड जेनेरेसनको र हामी जस्तै तेस्रो जेनेरेसनको बैंकसँग पनि कुराकानी भइरहेको छ, तर फाइनल भैसकेको छैन ।’
उनले राष्ट्र बैंकले मर्जरमा जाने भनेसँगै आफूहरु पनि मर्जर कमिटी बनाएर मर्जरको विषयमा ब्यापक छलफल गरिरहेको पनि बताए।
‘हामी अहिले ८/१० बैंकसँग मर्जरको लागि छलफल अगाडि बढाएका छौं, चाँडै फाइनल हुन्छ,’ उनले भने। सानो समाचारले शेयर बजारमा प्रभाव पार्ने भएकोले अहिले नै मर्जका लागि उपयुक्त बैकको बारेमा भन्नु ठीक नहुने तामाङले बताए।
उनले सिभिलभन्दा राम्रो बैंकसँग नै मर्ज हुने हुनाले लगानीकर्ता र कर्मचारीलाई ढुक्क हुन आग्रह गरे। ‘सिभिल भन्दा राम्रो काम, कृयाकलाप र प्रतिफल भएको बैंकसँग मर्ज गर्दा लगानीकर्ता र व्यवस्थापक सबैलाई फाइदा हुन्छ,’ उनले भने।
उनले मर्जरको चर्चा चलिरहेको बेला आइएसओ पाएकोले त्यसले मर्जरमा जाँदा सिभिल बैंक एक तहमाथि पुगेको महसुस भएको बताए ।
‘आइएसओले पनि हामीलाई फाइदा भएको छ,’ तामाङले भने, ‘यसले मर्जरको बेला सकारात्मक परिर्वतन् पारेको छ ।’
उनले मर्जरमा जानु सजिलो भने नभएको दाबी गरे। ‘मर्जर भन्ने सजिलो कुरा होइन धेरै कुराहरु मिलाउनुृ पर्ने रहेछ,’ तामाङले भने, ‘मर्जरमा जानको लागि स्वाप रेसियोभन्दा एउटा बैंकको वर्किङ कल्चर र अर्काे बैंकको वर्किङ कल्चर पनि मिलाउनु पर्ने रहेछ ।’
