लामो सयम देखि ओरालो लागेको शेयर बजारमा सुधारको संकेत देखिएको छैन। सामान्यतया नयाँ आर्थिक वर्षमा शेयर बजारलाई राम्रो समयको रुपमा हेरिन्छ। तर, यो वर्ष बजार निरन्तर ओरालो लागिरहेको छ।
विगत ४ महिनामा बजार १०० अंकले घट्यो। वैशाख मध्येतिर १३ सय १० अंकमा रहेको नेप्से सूचक गत हप्ता बजार बन्द हुने बेलामा १२ सय १३ अंकमा थियो।
‘प्राय सबै कम्पनीले यो समयमा लाभांश दिने हुनाले पनि यो वर्षभरिको खेतीको कमाइ खाने समय हो,’ शेयर लगानीकर्ता संघका अध्यक्ष उत्तम अर्यालले भने, ‘उत्साहजनक कारोबार हुनुपर्ने बेलामा लगानीकर्ताको मनोवल कमजोर हुदाँ शेयर बजार लगातार घटेको छ।’
शेयर बजारमा ओरालो लाग्नुको मूख्य कारण पुँजीगत लाभ करको समस्या समाधान नहुनूनै रहेको उनको दाबी छ । ‘बजार घटेकाले ठुला लगानीकर्ता पलाएन भएका छन्, नयाँ र साना लगानीकर्ता पनि आर्कषित भएको देखिदैन,’ उनले भने, ‘पूँजीगत लाभकरको समस्या अझै सुल्झेको छैन त्यसैले लगानीकर्ताहरु पर्ख र हेरको अवस्थामा छन्।’
उनले सरकारले नीति बनाउने र त्यसलाई कार्यान्वयन गर्न कुनै चासो नदेखाउने गरेकाले लगानीकर्ताको मनोवल गिरेको बताए ।
बैंकले ऋणको लागि बोलाइरहेको भएपनि लगानीको अवसर राम्रो नहुदाँ ऋण लिन नगएको उनले बताए। सरकारले पूँजी बजारमा ध्यान नदिदाँ लगानीकर्तामा विस्वास नहुनु नै शेयर बजार घट्नुको कारण ठान्छन् अर्याल।
पूँजीबजार लगानीकर्ता संघकी अध्यक्ष राधा पोखरेल पनि पूँजीगत लाभकरसँगै तरलताको समस्या रहेको बताउँछिन्। उनले भनिन्, ‘अहिले लगानीकर्ता पर्ख र हेरको अवस्थामा छन्, अर्को हप्तादेखि बजार बढ्छ।’
शेयर कारोबार गर्दा ल्याप्चे लगाउनु पर्ने परिपाटी हटेका कारण यसले सकारात्मक सन्देश दिने र बजार बढ्ने बताइन्।
उत्तम अर्याल भने लाभकर लगायतका समस्या समाधान नहुदाँ सम्म शेयर बजार नबढ्ने बताउँछन्। ‘यस्तै अवस्था भयो भने शेयर बजार बढ्दैन, तर सरकारले नीतिगत सुधार गर्यो भने सुधार हुन सक्छ,’ उनले भने ।
लगानीको लागि बाणिज्य बैंक राम्रो
लगातार बजार घटेपनि वाणिज्य बैंकमा लगानीको राम्रो अवसर रहेको लगानीकर्ता बताउँछन्। राधा पोखरेल भन्छिन्, ‘लगानी बढ्यो भने सबै क्षेत्रको शेयर बढ्छ। तर, बैंकको मूल्य पनि कम छ, यसमा लगानी गर्दा राम्रो हुन्छ।’
यस्तै, उत्तम अर्याल पनि अहिले वाणिज्य बैंकलाईनै आकर्षक क्षेत्र मान्छन्। ‘सस्तो, इमान्दार, पारदर्शी, बोनस तथा लाभांस पनि पूर्वानुमान गर्न सकिने अहिले वाणिज्य बैंकनै छन्, त्यसैले अहिलेको लगानीको उत्तम विकल्प भनेको वाणिज्य बैंक हो।’