कर्मचारी सञ्चय कोषले अब उत्पादनका क्षेत्रमा लगानी बढाउने भएको छ । साउन महिनामा मात्रै दुई ठुला परियोजनामा ३ अर्ब लगानी सम्झौता गर्दै यसको संकेत दिएको छ ।
कोषले साउनमा होङ्सी शिवम् सिमेन्टमा २ अर्ब र इस्वाखोला जलविद्युत आयोजनामा १ अर्ब गरि तीन अर्ब लगानी गर्ने सम्झौता गरेको छ ।
‘सुरक्षा प्रतिफल र नगद प्रवाहनै कोषको लक्ष्य भएकाले अब ठुलो लगानी आवस्यक रहेको क्षेत्रमा लगानी बढाउदै जानेछौ’कोषका लगानी विभागका विभागीय प्रमुख अर्जुन कुमार गौतमले भने।
कोषको लगानी कस्ता परियोजनामा ?
चिनियाँ लगानीमा नवलपरासीमा स्थापना भएको होङसी शिभम् सिमेन्टमा कोषलले २ अर्ब लगानी गर्न लागेको हो । ९ अर्बको लगानीमा स्थापना भएको उक्त सिमेन्ट उद्योगले थप लगानी भित्राएर क्षमता विस्तारको तयारी गरेको छ ।
कोषले एनएमबी बैंकको आग्रहमा सिमेन्ट उद्योगमा लगानी गरेको हो । त्यसो त सिमेन्ट उद्योगले आफ्नो क्षमता विस्तारको लागि १६ अर्ब आवस्यक रहेको जनाएको थियो ।
‘हामी एउटै आयोजनामा धेरै लगानी नगर्ने सोचले २ अर्ब मात्रै लगानी गरेका हौं’गौतमले भने।
कोषले इस्वुखोला जलविद्युत आयोजनामा १ अर्ब लगानी सम्झौता गरेको हो । सानिमा बैंकको अगुवाइमा कोषले उक्त जलविद्युतमा लगानी गरेको कोषले बताएको छ ।
‘सानिमा बैंक आफैमा जलविद्युतमा राम्रो अनुभव भएको बैंक हो, उसले २८ भन्दा बढी जलविद्युतमा लगानी गरिसकेको छ,’ उनले भने, ‘जलविद्युतमा काम गरेका अनुभव भएको टिमको कारण पनि बैंकसँग मिलेर लगानी गरेका हौं ।’
गौतमले लागत सस्तो भएका कारण पनि उक्त आयोजनामा लगानी सम्झौता गरेको बताए । अहिले इस्वखोला जलविद्युत आयोजनाको लागत १० करोड प्रतिमेगावाट मात्रै छ । आयोजनाको क्षमता ९७.२ मेगावाटको छ ।
किन छान्यो त यी दुई कम्पनी ?
कोषलले कम्पनीका तीन आधार हेरेर लगानी गर्ने बताउँछ ।
‘हामीसँग १० भन्दा धेरै कम्पनीहरु लगानीका आगि आए तर हामीले मूल्यङकन गरेर दुई कम्पनी मात्रै छानेका छौं,’ गौतमले भने ।
कोषलले लगानी गर्नको लागि सबैभन्दा पहिलो सर्त कम्पनीको प्रोफाइल त्यसपछि उसले लगानी गर्न लागेको प्रोजेक्ट र त्यसको व्यावस्थापकिय टिमलाई आधार मानेर लगानीका लागि कम्पनी छनौट गर्छ ।
कोषका अन्य लगानी
कोषले यसअघि पनि नेपाल वायुसेवा निगमको दुई वाइडबडी विमान किन्न पनि लगानी गरेको थियो । यो बाहेक, ४५६ मेगावाटको माथिल्लो तामाकोसी, १११ मेगावाटको रसुवा गढी, ५६ मेगावाटको तल्लो र माथिल्लो सन्जेन, १०२ को भोटेकोसीमा पनि लगानी गरेको छ।
कोषले परियोजना बाहेक शेयर बजारमा पनि लगानी गरिरहेको छ ।
‘हामीले २०४९ साल देखिनै शेयरमा लगानी गर्दै आएका छौं, अहिले सम्म २० कम्पनीमा ७ अर्ब भन्दा बढी कोषको लगानी छ,’ उनले भने ।
नेपाल राष्ट्र बैंकले नेप्सेको शेयर बेचेपछि केही समय अघिमात्रै पनि कोषले नेप्सेको शेयर किनेको थियो ।
