अर्थमन्त्री युवराज खतिवडाले नेपालको अर्थतन्त्र तीव्र रुपमा चलायमान रहेको बताएका छन्। उनले बैंकको क्षेत्र विस्तार तथा वीमा क्षेत्रको विस्तारलाई उदाहरण दिदैं अर्थतन्त्र चलायमान रहेको बताएका हुन्।
‘१९९४ मा पहिलो बैंकको रुपमा नेपाल बैंकको स्थापना भएयता २०७४ सम्म साँढे पाँच हजार बैंकको शाखा थियो’, उनले भने, ‘हाम्रो सरकार आएपछि विगत दुई वर्षमा ९ हजारको आसपासको संख्यामा बैंकको शाखा पुगिसकेको छ।’
उनले दुई वर्षमा प्रत्येक स्थानीय तहमा बैंकको शाखा पुग्नुपर्छ भन्ने कुरामा जोड दिएकाले बैंकको शाखा विस्तार भएको बताए।
‘अहिले केही स्थानीय तहमा मात्रै बैंकको शाखा पुगेको छैन, उनले थपे, सके पुससम्म नत्र आर्थिक वर्षको अन्त्यमा सबै स्थानीय तहमा शाखा कार्यलयमा बैंकको शाखा कार्यलय पुग्छ।’
यस्तै, पछिल्लो दुई वर्षमा वीमा सेवा शत प्रतिशतले बढेको पनि मन्त्री खतिवडाले दाबी गरे।
‘हाम्रो सरकार आउनुपूर्व वीमा सेवामा पहुँच १० प्रतिशत पनि थिएन अहिले २० प्रतिशत पुगेको छ, उनले भने, ‘वैदेशिक रोजगारीमा जानेको वीमासमेत जोड्दा २५ प्रतिशत भन्दा बढी पुगिसकेको छ।’
वीमाको दायरा बढ्नु निकै ठूलो कुरा भएको भन्दै वीमाबाट भएको बचत एकै वर्षमा ५५ प्रतिशत बढेको उनले दाबी गरे।
‘लघुवित्तको कारोबार पनि बढेको छ, यसले बैंकमा आर्थिक कारोबार बढेको देखाउँछ’, उनले भने।
काभ्रेको पनौतीमा अभियान लघुवित्त वित्तीय संस्थाको उद्घाटनमा बोल्दै उनले सो कुरा बताएका हुन्। पुर्व मन्त्री तथा नेकपाका नेता बामदेव गौतम तथा हरी पराजुलीको उक्त लघुवित्तमा लगानी रहेको छ ।
