नेपालले चिनियाँ बैंक संचालनका लागि सहजीकरण गर्ने भएको छ। चिनियाँ राष्ट्रपति सी चिनफिङको नेपाल भ्रमणपछि जारी गरिएको संयुक्त वक्तव्यमा सो कुरा उल्लेख गरिएको छ।
नेपाल–चीनबीच हुने संयुक्त व्यापार तथा लगानीको सहजीकरणका लागि चिनियाँ बैंकको शाखा खोल्न सहजीकरण गर्ने सहमति भएको हो।
विदेशी बैंकले नेपालमा शाखा खोल्न पाउने नीतिगत व्यवस्था रहेकाले चिनियाँ बैंकका शाखा संचालनका लागि कुनै बाधा नपुग्ने राष्ट्र बैंकका प्रवक्ता लक्ष्मीप्रपन्न निरौलाले बताए।
‘२०१० मा नै विदेशी बैंकलाई शाखा खोल्न दिने सम्वन्धमा नीतिगत व्यवस्था रहेकाले नीतिगत समस्या छैन’ उनले भने। चीनले खोल्ने शाखाबाट दुई देशका व्यापारीबीच हुने कारोबारलाई सहजता हुने र चिनियाँ लगानी समेत आकर्षित हुने विश्वास गरिएको छ।
हाल दुई विदेशी बैंकले नेपालमा आफ्ना सम्पर्क कार्यालय संचालनमा ल्याए पनि शाखा कार्यालय भने कुनैकाे पनि संचालनमा छैन। यसअघि प्रधानमन्त्री केपीशर्मा ओली चीन भ्रमणमा जाँदा नेपालमा चिनियाँ बैंकको शाखा खोलेर लगानीमा सहजीकरण गर्ने सम्झौता भएको थियो।