पछिल्लो समय नेपाली बैंकिङ प्रणालीमा प्रविधिको प्रयोग बढ्दै गएको छ। प्रविधिको विकास र विस्तारले सेवा प्रवाह र लिनेलाई सजिलो हुने भएकाले यसको प्रयोग व्यापकरुपले विस्तारित भएको छ।
नेपाल राष्ट्र बैंकका अनुसार पछिल्लो समय मोबाइल तथा इन्टरनेट बैंकिङ प्रयोगकर्ताको संख्यामा उल्लेख्य बृद्धि आएको छ।
केन्द्रीय बैंकले हालै गरेको नेपालमा वित्तीय पहुँचसम्बन्धि अध्ययनले मोबाइल बैंकिङ प्रयोगकर्ताको संख्या गएको चार वर्षमा पाँच गुनाले बढेको देखाएको छ।
उक्त अध्ययनअनुसार २०७३ मा नेपालभर १७ लाख ५४ हजार ५६६ जना मोबाइल बैंकिङका प्रयोगकर्ता भएकोमा २०७६ सम्म आइपुग्दा ८३ लाख ४७ हजार १८७ जना पुगेको छ।
नेपालमा बैंक तथा वित्तीय संस्थाहरुको कूल संख्या १७१ रहेको छ। त्यस्ता संस्थाहरुको शाखा सञ्जाल भने ८ हजार ८०५ रहेको छ। बैंक तथा वित्तीय संस्थाहरुको शाखा सञ्जाल पनि गएको चार वर्षमा दोब्बरले बढेको छ।
मोबाइल बैंकिङसँगै इन्टरनेट बैंकिङ प्रयोगकर्ताको संख्यामा पनि उल्लेख्य बृद्धि भएको छ। गएको चार वर्षमा ४ लाखबाट यस्ता प्रयोगकर्ता अहिले ९ लाख पुगेको अध्ययनले देखाएको छ।
चेक र क्यासको सट्टा अनलाइन भुक्तानी तथा कारोबारप्रति उपभोक्ताको आकर्षण बढ्दै गएपनि त्यसका लागि चुस्त नियमनको व्यवस्था गर्न केन्द्रीय बैंक तातिएको छैन।
