नेपाल स्टक एक्सचेन्ज (नेप्से)मा ४० कम्पनीले आफ्नो कम्पनी नविकरण गराएका छन्।
असोज मसान्तसम्म वार्षिक शुल्क नबुझाएको भन्दै नेप्सेले कारोबार रोक्का गरेपछि उनीहरुले कम्पनी नविकरण गरेका हुन्।
नविकरण गरेसँगै शेयर कारोबार पनि सुरु भएको छ।
आर्थिक वर्ष सकिएपछि नेप्सेमा सुचिकृत हरेक कम्पनीले आफ्नो कम्पनी नविकरण गर्नुपर्छ।
त्यसको लागि तीन महिनाको समयसिमा थियो। तर, समय सिमामा पनि नविकरण नगरेपछि असोज मसान्तपछि नेप्सेले कारोबारनै रोक्का गरिदिएको थियो।
नेप्सेले गत हप्ता नविकरण नगरेका कम्पनीको सुची नै सार्वजनिक गरेको थियो।
धितोपत्र सूचीकरण विनियमावली २०७५ अनुसार नविकरण नगरेका कम्पनीको सूचीकरण तथा कारोबार स्थगीत गर्ने अधिकार नेप्सेलाई छ।
कारोबार नै रोक्का गरेपछि मंगलबारसम्म ४० कम्पनीले नविकरण गरीसकेको नेप्सेले जनाएको छ।
नेपाल टेलिकम, सोल्टी होटल, याक एण्ड यति, लाइफ इन्स्योरेन्स, प्रभु इन्स्योरेन्स, चिलिमे पावर, अपि पावर लगायत कम्पनीको कारोबार रोक्का भएको थियो।
अहिले यी सबै कम्पनी नविकरण भइसकेका छन्।
धितोपत्र सूचीकरण विनियमावलीअनुसार ५० करोड रुपैयाँ बरावरको शेयर सूचीकृत कम्पनीले नविकरण शुल्क वार्षिक ५० हजार र त्यसभन्दा धेरै चुक्ता पुँजी भएको कम्पनीले एक लाख रुपैयाँ बुझाउनुपर्ने व्यवस्था छ ।
धेरै कम्पनीको नेप्सेमा नविकरण नभएपछि पछिल्लो केही दिनदेखि शेयर कारोबारमा पनि मन्दी आएको थियो।
रोक्का भएका आधा भन्दा बढी कम्पनीले नविकरण शुल्क बुझाएर नविकरण गरेकाले आजदेखि भने शेयर कारोबार बढ्नसक्ने देखिएको छ ।
.JPG)
