ग्लोबल आइएमई बैंक र जनता बैंकबीच मर्जरसम्बन्धी अन्तिम सम्झौतापत्रमा हस्ताक्षर भएको छ।
एक समारोहबीच ग्लोबल आइएमई बैंकका अध्यक्ष चन्द्रप्रसाद ढकाल र जनता बैंक नेपालका अध्यक्ष केशवबहादुर रायमाझीलले अन्तिम सम्झौतापत्रमा हस्ताक्षर गरे।
दुवै बैंकले नेपाल राष्ट्र बैंकको अन्तिम स्वीकृतिपश्चात् एकीकृत कारोवार शुरु गर्नेछन्। यी दुई बैंकले गत असार २० गते मर्जरका लागि प्रारम्भिक सहमतिपत्रमा हस्ताक्षर गरेका थिए। मर्जरपछि बन्ने बैंकको नाम ग्लोबल आइएमई बैंक रहने छ। अध्यक्ष चन्द्रप्रसाद ढकाल हुने सहमति भएको छ भने सञ्चालक समितिमा ग्लोबलको तर्फबाट पाँच जना र जनताको तर्फबाट दुई जना रहने छन्।
त्यस्तै मर्जरपछि बन्ने बैंकको सिइओ पर्शुराम कुँवर क्षेत्री रहनेछन्। उनी यसअघि जनता बैंकको प्रमुख कार्यकारी थिए। ग्लोबल आइएमई बैंकका कामु सिइओ महेश शर्मा ढकाल, वरिष्ठ डेपुटी सिइओ हुने सहमति भएको छ।
मर्जपछि चुक्ता पुँजी, निक्षेप संकलन, कर्जा प्रवाह तथा शाखा संख्याको आधारमा सबैभन्दा ठूलो बैंक हुनेछ।
संयुक्त बैंकको चुक्ता पूँजी करिब १९ अर्ब, कूल निक्षेप दुई खर्ब १२ अर्ब र कूल कर्जा लगानी दुई खर्ब पुग्नेछ। त्यस्तै बैंकको शाखा सञ्जाल ३०० भन्दा बढी र ३ हजार २५० भन्दा बढी कर्मचारी रहने छन्।
उक्त सम्झौता कार्यक्रममा ग्लोबल आइएमई बैंकका अध्यक्ष चन्द्रप्रसाद ढकालले नेपाल सरकार र नेपाल राष्ट्र बैंकको ठूला वित्तीय संस्थाको मर्जरसम्बन्धी नीति कार्यान्वयनमा सहयोग पुग्ने गरी दुबै बैंकबीच मर्ज भएको बताउँदै मर्जपछि यो संस्था ७७ जिल्लामै शाखा सञ्जाल भएको नेपालकै सबैभन्दा ठूलो बैंक बन्ने बताए।
उनले दुवै बैंकको वार्षिक साधारणसभा सम्पन्न गरी संयुक्त कारोवार शुरु गरिने जानकारी दिए। ग्लोबल आइएमई बैंक मर्जरमा सधैँ अग्रपङ्क्तिमा रहेको बताउँदै अध्यक्ष ढकालले यसअघि १७ वटा विभिन्न वित्तीय संस्थासँग मर्ज गरी हाल जनता बैंकसँग अठारौँ मर्ज गरेको र यो वित्तीय क्षेत्रमा नयाँ कीर्तिमान रहेको दावी गरे।
सो अवसरमा जनता बैंकका अध्यक्ष केशवबहादुर रायमाझीले देशको उत्कृष्ट वित्तीय संस्था स्थापना गर्ने योजना एवं नीतिबमोजिम ग्लोबल आइएमई बैंकसँग नेपाल राष्ट्र बैंकको सहमति लिएर मर्जर गरिएको बताए। उनले ग्लोबल बैंकसँगको मर्जरका सम्पूर्ण प्रक्रिया टुङ्गो लागिसकेकाले चाँडै संयुक्त कारोवार हुने बताए। (राससको सहयोगमा)
