नागरिक लगानी कोषले स्टक डिलर संचालनमा ल्याएको छ। कोषको बहुस्वामित्वमा ‘नागरिक स्टक डिलर’ नामक कम्पनी खुलेको हो।
धितोपत्र बजारमा लगानी गर्ने र बजारको अनपेक्षित उतारचढावलाई नियन्त्रण गर्ने उद्देश्यले स्टक डिलर कम्पनी खुलेको कोषका प्रवक्ता उद्धव सिलवालले जानकारी दिए। कम्पनीको प्रवन्धपत्र र नियमावली तयार भइसकेको उनले बताए।
स्टक डिलर कम्पनीमा कोषको ५१ प्रतिशत, नेपाल टेलिकमको ९ प्रतिशत, पुनर्बीमा कम्पनीको १० प्रतिशत सेयर स्वामित्व रहेको छ। सर्वसाधारणका लागि ३० प्रतिशत सेयर छुट्याइएको छ।
कम्पनी संचालनमा आएको दुई वर्षभित्र ३० प्रतिशत पब्लिक सेयर जारी गरिनेछ। हाल स्टक डिलर कम्पनीको चुक्ता पुँजी ५ अर्ब र जारी पुँजी १० अर्ब रहेको उनले बताए।
स्टक डिलरको ५ जनाको संचालक समिति गठन हुनेछ। जसमा एक जना सर्वसाधारण सेयरधनीबाट छनौट हुनेछ भने २ जना नागरिक लगानी कोष र टेलिकम तथा पुनर्बीमा कम्पनीबाट १–१ जनाको प्रतिनिधित्व हुनेछ।
सर्वसाधारणतर्फ सेयर जारी गर्न बाँकी रहेकाले तत्कालका लागि कोषकै तर्फबाट थप १ जना संचालक समितिमा रहने छन्।
कोषले स्टक डिलरको संचालक समितिमा कसलाई पठाउने भन्ने निर्णय गरिसकेको छैन। स्टक डिलर कम्पनीको संचालक समितिले पूर्णता पाएपछि मात्रै यसको कार्यालय कहाँ राख्ने, कसरी संचालन गर्ने, विज्ञ टिममा को को राख्नेजस्ता विषयमा निर्णय गर्ने सिलवालले बताए।
हाल नागरिक लगानी कोषले पनि सेयर बजारमा लगानी गर्दै आएको छ। तर कोषले गरेको अहिलेको लगानीसँग स्टक डिलरको कुनै सम्वन्ध रहने छैन।
स्टक डिलरले विभिन्न कम्पनीका धितोपत्रहरुमा लगानी गर्नेछ। ‘कम्पनीहरुको सेयर मूल्य सस्तो भएका बेलामा खरिद बढाउने र मूल्य बढेका बेला बजारमा आपूर्ति बढाएर सन्तुलित गर्ने यसको प्रमुख उद्देश्य हो’ कोषका प्रवक्ता सिलवालले भने।
यसले बजारको उच्च उतारचढाव नियन्त्रण हुनेछ। हाल बजार घट्दा उच्च दरले घट्ने र बढ्दा पनि उच्च दरले बढ्ने गरेको छ।
कुनै निश्चित समूहले मिलेमतो गरी बजारलाई काबुमा राख्न नसकोस् भन्ने उद्देश्यले मार्केट डिलर संचालनमा आएको हो। लामो समयदेखि सेयर लगानीकर्ताले मार्केट डिलर संचालन हुनुपर्ने माग राख्दै आएका थिए।
