चैतमा बैंकलाई बुझाउनुपर्ने मासिक वा त्रैमासिक किस्ता बुझाउन नसक्नेलाई २०७७ असार मसान्तसम्मको सीमा अवधि दिइएको छ।
राष्ट्र बैंकले बैंक तथा वित्तीय संस्थाहरुलाई यस्तो निर्देशन दिएको हो। असार मसान्तसम्म किस्ता बुझाउँदा बैंकले थप कुनै शुल्क वा ब्याज भने लिन पाउने छैनन्।
क्रेडिट कार्डको हकमा पनि यही व्यवस्था लागू हुने राष्ट्र बैंकले जनाएको छ। विश्वव्यापी रुपमा फैलिएको कोरोनाभाइरसले सबै व्यवसायमा असर परेपछि राष्ट्र बैंकले बैंक तथा वित्तीय संस्थाहरुलाई यस्तो निर्देशन दिएको हो।
चैतमा नबुझाएको किस्ताका कारण बैंकहरुले सो कर्जालाई तल्लो स्तरमा वर्गीकरण गर्नुपर्ने छैन।
चैत मसान्तमै बुझाउनेले भने मासिक वा त्रैमासिक किस्तामा जोडिने ब्याजमा १० प्रतिशत छुट पाउने भएका छन्।
त्यस्तै राष्ट्र बैंकको पुनर्कर्जा कोषको आकार ६० अर्ब बनाइएको छ। उत्पादनमुलक उद्योगी व्यसायीलाई सहुलियत व्याजमा यो कोषबाट ऋण लिन पाउने व्यवस्था छ।
चैत महिनामा नवीकरण गर्नुपर्ने कर्जाहरु नवीकरण नभएको आधारमा चैत मसान्तमा सुक्ष्म निगरानी वर्गमा वर्गीकरण गर्नु अनिवार्य हुने छैन।
चैत महिनाा भुक्तानी अवधि तोकिएक सबै चालु पुँजी प्रकृतिका अल्पकालीन कर्जाको भुक्तानी अवधि ६० दिनसम्म थप गर्न सकिनेछ।
२०७६ पुस मसान्तसम्म ब्याज तथा साँवा नियमित भुक्तानी गरेका पर्यटन तथा यातायात क्षेत्रका ऋणीले अल्पकालीन कर्जाको माग गरेमा साँवा तथा ब्याज बक्यौता रहेता पनि आवश्यकताअनुसार निश्चित सीमासम्म संक्षिप्त प्रक्रिया अपनाई ५ दिनभित्र कर्जा प्रवाह गर्नुपर्नेछ।
यस्तो सीमा स्वीकृत गर्दा ०. २५ प्रतिशतभन्दा बढी शुल्क लिन पाइने छैन।
चैत मसान्तसम्म ब्याज पुँजीकरण गरिएका ऋणीको हकमा २०७७ असार मसान्तसम्म पुँजीकरण गर्न सकिनेछ।
