नेपाल राष्ट्र बैंकले बैंक तथा वित्तीय संस्थाहरुबाट ऋण लिएकालाई चौथो त्रैमासको व्याजमा सहुलियत प्रदान गर्ने जनाएको छ।
नेपाल राष्ट्र बैंकको ६५ औं वार्षिकोत्सवका अवसरमा गभर्नर महाप्रसाद अधिकारीले दिएको वक्तव्यमा सो कुरा उल्लेख गरिएको छ।
यसअघि राष्ट्र बैंकले चैत मसान्तमा बुझाउनुपर्ने किस्ता सो समयमा बुझाएमा व्याजवापत १० प्रतिशत छुट दिने व्यवस्था गरेको थियो।
तर लकडाउन लम्बिँदै गएपछि गभर्नर अधिकारीले असार मसान्तमा बुझाउनुपर्ने चौथो त्रैमासकाे ब्याजमा थप सहुलियत प्रदान गर्ने आशय वक्तव्यमा उल्लेख गरेका छन्।
विद्यमान परिस्थितिमा आर्थिक क्रियाकलाप विस्तारलाई प्रोत्साहित गर्न आगामी दिनमा सो व्यवस्था मिलाइने गभर्नर अधिकारीले प्रतिबद्धता जनाएका छन्।
त्यस्तै कोरोनाभाइरसबाट प्रभावित क्षेत्रलाई चालु पुँजी कर्जा प्रदान गर्ने व्यवस्थालाई थप सहज बनाउन आवश्यक व्यवस्था मिलाइने गभर्नरले बताएका छन्।
जारी वक्तव्यमा भनिएको छ ‘साना तथा मझौला उद्योग, पर्यटन र कोभिड १९ को प्रभाव अत्याधिक परेका क्षेत्रमा प्रादेशिक सन्तुलन समेत कायम हुनेगरी यस बैंकबाट प्रदान गरिने पुनरकर्जा सहज ढङ्गले प्रवाह गर्न पुनरकर्जा कार्यविधिमा संशोधन गरिनेछ।’
६० अर्बको विद्यमान पुनरकर्जा कोषलाई आवश्यकता अनुसार वृद्धि गर्दै लैजाने व्यवस्था मिलाइने राष्ट्र बैंकले जनाएको छ।
कोरोनाबाट बढी प्रभावित भएका क्षेत्रमा प्रवाह भएको कर्जालाई पुनरतालिकीकरण वा पुनसंरचना गर्न सकिने सुविधा प्रदान गर्न आवश्यक व्यवस्था मिलाइने बैंकले जनाएको छ।
लकडाउनको अवधिमा भुक्तानी गर्नुपर्ने कर्जाको भुक्तानी अवधि थप गर्न सकिने व्यवस्था मिलाइने वक्तव्यमा उल्लेख छ।
यसअघि राष्ट्र बैंकले चैत मसान्तमा बुझाउनुपर्ने बैंकको मासिक वा त्रैमासिक किस्ता असार मसान्तसम्म बुझाउन सकिने व्यवस्था गरेको थियो। वक्तव्यले सो समयावधि पनि थप्न सक्ने संकेत गरेको छ।
राष्ट्र बैंकले बैंक तथा वित्तीय संस्थाहरुमा वैशाख ११ गतेसम्म अनिवार्य नगद मौज्दात बाहेक ४५ अर्ब ७८ करोड अधिक तरलता रहेको जनाएको छ।
हेर्नुस्, गभर्नरले जारी गरेकाे वक्तव्य