राष्ट्र बैंकले प्रदान गर्ने पुनर्कर्जाको क्षमता विस्तार गरेर १ खर्ब पुर्याइने भएको छ।
वैशाख १४ गते बसेको मन्त्रिपरिषद बैठकले नेपाल राष्ट्र बैंकलाई पुनर्कर्जाको क्षमता विस्तार गर्न आग्रह गर्ने निर्णय गरेको हो।
साथै पुनर्कर्जा कोषबाट जाने रकमको व्याज समेत घटाउन राष्ट्र बैंकलाई आग्रह गर्ने निर्णय बैठकले गरेको छ।
यसअघि राष्ट्र बैंकले पुनर्कर्जा कोषको आकार बढाएर ६० अर्ब रुपैयाँ कायम गर्ने निर्णय गरेको थियो। राष्ट्र बैंकले तोकेका प्राथमिकयुक्त क्षेत्रमा सहुलियत ब्याजदरमा कर्जा प्रवाह होस् भन्ने उद्देश्यले यस्तो कोष खडा गरिएको हुन्छ।
कोषमार्फत् कृषि, उर्जा तथा पर्यटन क्षेत्रमा लगानी गर्नेले सहुलियत ब्याजदरमा ऋण प्राप्त गर्न सक्नेछन्।
साथै नवीकरणीय उर्जाबाट चल्ने सार्वजनिक सवारी साधनका लागि दिइने कर्जालाई समेत प्राथमिकप्राप्त कर्जामा गणना गर्ने व्यवस्था मिलाइएको छ। त्यस्ता सवारी साधनका लागि पनि सहुलियत व्याजदरमा ऋण प्राप्त हुनेछ।
