नेपाल राष्ट्र बैंकका गभर्नर महाप्रसाद अधिकारीले अहिलेको परिस्थितिमा नयाँ योजनालाई बजेट छुट्याउन नसकिने बताएका छन्।
हिजोका योजनाहरु अगाडि बढाउन अहिलेको स्रोत र सीमाहरु अपर्याप्त रहेकाले नयाँ योजनका लागि बजेट छुट्याउन सक्ने अवस्था नभएको उनको भनाइ छ।
पाइप लाइनमा रहेका योजनाहरुलाई प्राथमिकतामा राखेर अगाडि बढ्नुपर्ने परिस्थितिमा नयाँ योजनाहरु आउन समय लाग्ने अधिकारीले बताए।
उनले भने ‘नयाँ योजनाहरुका लागि थप प्लानिङ गर्नुपर्ने हुन्छ। हिजो तयार भएका योजनालाई पुनः प्राथमिकीकरण गर्नु पर्ने हुन्छ, ती सबै योजना हिजो सोचेजस्तै गरी अहिले टाइमलाइनमा जान समस्या नै छ।’
साना तथा घरेलु व्यवसायीलाई लक्षित गरी नेपाल राष्ट्र बैंकले पुनर्कर्जा सम्बन्धी कार्यविधि परिमार्जन गर्ने तयारी गरेको छ। साना तथा घरेलु व्यवसायीहरुलाई प्राथमिकता दिनेगरी पुनर्कर्जा कार्यविधि परिमार्जन गरिने गभर्नर अधिकारीले बताए।
पुनर्कर्जाको प्रकृया धेरै लामो भएकाले प्रयोगमा नआएको र ठूला खालका ऋणीहरुले मात्रै पहुँच रहेकाले कार्यविधि परिमार्जन गरिन लागेको उनले बताए।
उनले भने ‘अहिलेको प्रोसेस धेरै लामो भयो। ठूला खालका ऋणीहरुले मात्रै पाएको जस्तो देखियो। सानो भन्दा सानो ग्राहकले पनि पाउनेगरी कार्यविधि बनाउँदैछौँ। सामान्य पुनर्कर्जामा २ प्रतिशत व्याज छुट हुन्छ। हिजो राष्ट्र बैंकले ३ र अन्य बैंकहरुले ७ प्रतिशत ब्याज लिँदै आएका थिए। अब त्यसलाई घटाएर राष्ट्र बैंकले २ र अन्य बैंकले ५ प्रतिशतमा दिनुपर्ने छ।’
सरकारले पुनर्कर्जाको सीमा पनि विस्तार गरेको छ। पुनर्कर्जाको सीमा विस्तार गरी १ खर्ब पुर्याउने निर्णय सरकारले गरेको हो।
पुनर्कर्जा कोषबाट प्रवाह हुने कर्जाको ब्याजदर घटाउने व्यवस्थाका लागि नेपाल राष्ट्र बैंकले व्यवस्था मिलाउनुपर्ने र साना तथा घरेलु उद्योगहरु सञ्चालनका लागि आवश्यक पर्ने चालु पूँजी कर्जा सहुलियत दरमा उपलब्ध गराउन पनि सरकारले राष्ट्र बैंकलाई भनेको छ।
