लकडाउनका बेला अघिल्ला दुई दिन खुलेको सेयर बजार पुनः बन्द गरिएको छ।
नेपाल धितोपत्र बोर्डले सेयर कारोबार स्थगित गर्न निर्देशन दिएसँगै कारोबार बन्द भएको नेप्सेले जनाएको छ।
नेप्सेका प्रवक्ता मुराहरि पराजुलीले जेठ ५ गतेसम्मका लागि कारोबार स्थगित गरिएको जानकारी दिए। ‘त्यसपछि लकडाउन खोल्ने/नखोल्ने निर्णयबाट मात्रै कारोबार थाल्ने/नथाल्ने टुंगो लाग्नेछ’ उनले भने।
अघिल्ला दुई दिन खुलेको सेयर बजार लगातार २ - २ प्रतिशतका दरले घटेपछि बीचमै सर्किट ब्रेक लागेको थियो। खुलेको दुई दिनमा बजार ५० अंकले घटेको छ। हाल नेप्से परिसूचक १२०१ अंकमा छ।
कारोबार स्थगित हुनुमा लगानीकर्ताको पनि समर्थन छ। ‘यहाँ अनलाइन प्रणालीबाट हुने कारोबार एकदमै कम छ, भुक्तानीका समस्या पनि छन्’ लगानीकर्ता पिताम्बर खरेलले भने ‘त्यसकारण तत्काल कारोबार नखोल्नु नै उत्तम हुन्छ।’
लकडाउनका बेला खुलेको सेयर बजारमा पहिलो दिन १० करोडको कारोबार भएको थियो भने दोस्रो दिन ३६ लाखमा सीमित भएको थियो।
