नेपाल राष्ट्र बैंकले बैंक तथा वित्तीय संस्थाहरुलाई कोभिड १९ का सम्वन्धमा थप निर्देशन जारी गरेको छ।
पछिल्लो समय बैंक तथा वित्तीय संस्थाका कर्मचारी समेत संक्रमित हुन थालेपछि राष्ट्र बैंकले थप निर्देशन जारी गरेको हो।
आफ्ना कर्मचारीको पिसिआर परीक्षण खर्च बैंकहरुले नै ब्यहोर्नुपर्ने राष्ट्र बैंकको निर्देशनमा उल्लेख छ।
इलाकाबाहिर खटाएका कर्मचारी संस्थामा फर्किँदा पिसिआर टेष्ट गराउन र नेगेटिभ पुष्टि भएपछि मात्रै कार्यालय आउने व्यवस्था गर्न राष्ट्र बैंकले भनेको छ।
त्यस्तै संक्रमित कर्मचारीलाई तुरुन्त व्यवस्थित रुपमा घर, अस्पताल वा होटलमा (आइसोलेसनमा) सुरक्षित रहनेगरी आवश्यक व्यवस्था गर्न राष्ट्र बैंकले निर्देशन दिएको छ। सोवापत लाग्ने सबै खर्च बैंकहरुले नै ब्यहोर्नुपर्ने निर्देशनमा स्पष्ट भनिएको छ।
अन्य कुनै संक्रमितको सम्पर्कमा परेका कर्मचारीलाई पनि होटलमा (क्वारेन्टिनमा) सुरक्षित राख्नुपर्ने र सोको खर्च संस्थाले नै ब्यहोर्नुपर्ने निर्देशनमा उल्लेख छ।
इच्छुक कर्मचारीको पनि बैंकहरुले खर्च ब्यहाेरेर पिसिआर टेष्ट गराउनु पर्नेछ।
आइसोलेसनमा बसेका कर्मचारीलाई अतिरिक्त विदाको व्यवस्था गर्ने र क्वारेन्टिनमा बसेका कर्मचारीलाई सो अवधिमा घरबाटै काम गर्ने व्यवस्था मिलाउन राष्ट्र बैंकले निर्देशन दिएको छ।
बैंकिङ सेवा प्रवाहका लागि कर्मचारीलाई आवश्यक पर्ने मास्क, पञ्जा, सेनिटाइजर, फेस सिल्ड जस्ता सुरक्षाका उपकरण पनि बैंक तथा वित्तीय संस्थाहरुले पर्याप्त मात्रामा उपलव्ध गराउनुपर्नेछ।
अत्यावश्यक बाहेकका सबै बैठक, सेमिनार, छलफल नगर्न नगराउन बैंक तथा वित्तीय संस्थाहरुलाई निर्देशन दिइएको छ। सकेसम्म घरबाटै काम गर्ने व्यवस्था मिलाउन, विद्युत्तीय माध्यमलाई प्रोत्साहन गर्न राष्ट्र बैंकले निर्देशन दिएको छ।