अघिल्लो वर्ष अर्को वाणिज्य बैंक जनता बैंकसँग मर्जर गरेको ग्लोबल आइएमइ बैंकले गएको वर्षको अन्तिम त्राइमासको वित्तीय विवरण सार्वजनिक गरेको छ।
बैंकले गएको वर्ष खुद सञ्चालन आयमा २८ प्रतिशतको बृद्धि गरेर ८ अर्ब ९० करोड पुर्याएको छ।
बैंकले गएको वर्ष ब्याज आम्दानी २१ अर्ब ७ करोड गरेको छ भने ब्याद खर्च १२ अर्ब ५५ करोड गरेको छ।
खुद ब्याज आम्दानी ८ अर्ब ५१ करोड गरेको बैंकले शुल्क तथा कमिसनबाट १ अर्ब ३२ करोड कमाएको छ।
बैंकले गएको वर्ष ४ अर्ब ६० करोड सञ्चालन मुनाफा आर्जन गरेको छ भने असार मसान्तसम्मको लेखा परीक्षण नभएको विवरणअनुसार ३ अर्ब ८ करोड खुद मुनाफा आर्जन गरेको छ।
यसरी कमाएको नाफाबाट शेयरहोल्डरहरुलाई वितरण गर्नमिल्ने नाफा भने १ अर्ब ७२ करोड रहेको छ।
१८ अर्ब ९७ करोड चुक्ता पुजी भएको बैंकको जगेडा ८ अर्ब ४१ करोड रुपैयाँ छ। प्रति शेयर आम्दानी १६ रुपैयाँ २७ पैसा भएको बैंकको खराब कर्जा १.८० प्रतिशत पुगेको छ।
बैंकले गएको वर्ष २ खर्ब १२ अर्ब निक्षेप संकलन गरेको छ। अघिल्लो वर्ष १ खर्ब २० अर्ब संकलन गरेको थियो। त्यस्तै ऋण लगानी १ खर्ब ९२ अर्ब परिचालन गरेको छ। अघिल्लो वर्ष बैंकले १ खर्ब १२ अर्ब ऋण लगानी गरेको थियो।
त्यस्तै अघिल्लो वर्ष कूल सम्पत्ति १ खर्ब ५५ अर्ब रहेको बैंकको गएको वर्ष बढेर २ खर्ब ७७ अर्ब पुगेको छ भने दायित्व पनि १ खर्ब ३८ अर्बबाट बढेर २ खर्ब ४७ अर्ब पुगेको छ।
