सेयर बजार लगानीकर्ताका संगठनले ब्रोकर कमिसन घटाउन माग गरेका छन्।
पाँच संगठन (इन्भेष्टर फोरम, सेयर लगानीकर्ता संघ, पुँजीबजार लगानीकर्ता संघ, पुँजी बजार संघ, सेयर लगानीकर्ता दवाव समूह) ले संयूक्त विज्ञप्ति जारी गर्दै ब्रोकर कमिसन घटाउने विषयलाई प्राथमिकता दिन धितोपत्र बोर्डलाई आग्रह गरेका छन्।
‘ब्रोकर कमिशन ०.२५ प्रतिशत कायम गर्न सेवोन अध्यक्षबाट आयोग गठन भई सो आयोगले प्रतिवेदन समेत तयार गरिसकेको र कात्तिक १ गते बाट कमिशन घटाउने भनेर विभिन्न मिडियामा समेत अन्तर्वार्ता दिनु भएको यथार्थतालाई दृष्टिगत गर्दै यथासक्य कमिशन घटाउन हार्दिक अनुरोध गर्दछौं’ विज्ञप्तिमा भनिएको छ।
हाल सेयर लगानीकर्ताले सेयर खरिद वा बिक्री गर्दा रकमका आधारमा अधिकतम ०. ६ प्रतिशतसम्म ब्रोकर कमिसन बुझाउँदै आएका छन्। ५० हजार मुनिको कारोबार गर्दा लगानीकर्ताले ०.६ प्रतिशत कमिसन बुझाउनुपर्छ।
त्यस्तै अनलाइन प्रणालीमा आइरहने समस्या अझै पनि विद्यमान रहेको भन्दै उनीहरुले सो समस्याको दिर्घकालीन समाधानको लागि आग्रह गरेका छन्।
मेरो सेयरमा आइरहेको गडबडीले सेयर बजारलाई नकारात्मक असर पारिरहेकोले सो समस्याको अविलम्ब समाधान गर्न लगानीकर्ताले आग्रह गरेका छन्।
सेयर बजारले नयाँ उचाई कायम गरे पनि बैंक तथा वित्तीय संस्थाहरूको मूल्य अहिले पनि न्यूनतम अवस्थामै रहेको विज्ञप्तिमा उल्लेख छ।
लगानीकर्ताहरूले आफूले लगानी गर्ने कम्पनीहरूको विगतको इतिहास, संचालकहरूको सामाजिक हैसियत, कम्पनीद्वारा वितरित लाभांश इतिहास र भविष्यमा पाउने प्रतिफल जस्ता आधारभूत कुराहरूको गहन अध्ययन र विश्लेषण गरेर मात्रै लगानी गर्नुपर्नेमा संगठनहरुले सुझाव दिएका छन्।
‘विज्ञको सल्लाह बिना कसैको लहलहैमा लागेर बिना अध्ययन लगानी गर्दा आफ्नो मिहेनत र पसिनाको कमाईमा नोक्सानी पनि हुनसक्ने तर्फ संवेदनशील भई लगानी गर्नुहुन हामी सम्पुर्ण लगानीकर्तालाई अनुरोध गर्दछौं’ विज्ञप्तिमा भनिएको छ।
नियामकले पछिल्लो पटक पुँजी बजारको विकासका लागि चालेका कदमप्रति पनि संगठनहरुले धन्यवाद दिएका छन्।
बिहीबार मात्रै सेयर बजारको परिसूचक नेप्सेले हालसम्मकै उच्च विन्दु १ हजार ८९३ अंकको रेकर्ड बनाएको छ। सो दिन ७ अर्ब ६१ करोड रुपैयाँको सेयर किनबेच भएको थियो। यो कारोबार रकम पनि हालसम्मकै उच्च हो।
