इन्फ्रास्ट्रक्चर बैंकको प्राथमिक सेयर (आइपिओ)मा हालसम्मकै सबैभन्दा धेरै आवेदन परेको छ।
बैंकको आइपिओमा १५ लाख २९ हजार ४६० जनाले आवेदन दिएका छन्। ‘यो अहिलेसम्म हामीले संकलन गरेको आवेदन हो, बैंकबाट आवेदन दिएकाहरूको थपिन बाँकी नै छ’ सिडिएस एण्ड क्लियरिङका प्रवक्ता सुरेश न्यौपानेले सेतोपाटीलाई भने।
बैंकमार्फत आवेदन दिनेहरु जोड्दा यो संख्या अझ बढ्नेछ। हालसम्म आइपिओ खुलेको कम्पनीमध्ये यसमा परेको आवेदन संख्या सबैभन्दा धेरै हो।
बैंकले अंकित मूल्य १ सयका दरले कुल ७ करोड ५८ लाख ४० हजार कित्ता सेयर सर्वसाधारणका लागि खुल्ला गरेको हो।
१५ लाख बढी आवेदकले कुल १८ अर्ब १२ कराेड बढी रकमको सेयर माग गरेका छन्। मागभन्दा बढी परेपछि आवेदन लिने कार्य बन्द भएको छ।
कम्पनीको सेयर बाँडफाँड भएपछि मात्रै आवेदकको बैंक खाताबाट परेको सेयरको रकम प्रतिकित्ता १ सयका दरले काटिनेछ। सेयर नपरेको रकम फुकुवा हुनेछ। आवेदन दिएको रकम बाँडफाँड नहुँदासम्म बैंक खातामा ‘ब्लक’ रहन्छ।
कति पर्ला तपाईंलाई ?
धितोपत्र बाँडफाँड निर्देशिकाअनुसार पुगेसम्म सबैलाई १० कित्ता र सोभन्दा बढी सेयर बाँडफाँड गर्न पुग्ने अवस्थामा १० ले गुणा जाने अंकमा बाँडफाँड गर्नुपर्छ।
इन्फ्रास्ट्रक्चरमा परेको आवेदनअनुसार ४० कित्तासम्मका लागि आवेदन दिने सबैले मागेजति नै सेयर पाउने छन्। ५० कित्ता र सोभन्दा बढी सेयर माग गर्नेले भने गोलाप्रथाबाट ५० कित्ता वा ६० कित्तासम्म सेयर पाउने छन्।
६० कित्ताभन्दा धेरै भने बाँडफाँड गर्न नपुग्ने देखिन्छ।
कतिसम्म पुग्ला बजार मूल्य?
अहिले नै कतिपय लगानीकर्तामा बजार मूल्य कस्तो होला भन्ने काैतुहलता समेत बढेको छ।
कम्पनीको वित्तीय स्थितिअनुसार नै दोस्राे बजारले मूल्य तय गर्दछ। कम्पनीको वित्तीय स्थिति त्यति धेरै बलियो भइसकेको छैन। जसले गर्दा बजारमा तत्कालै मूल्य धेरै नबढ्ने अनुमान गर्न सकिन्छ।
यो विभिन्न विकास आयोजनाहरुमा ऋण लगानी गर्नका लागि स्थापित भएको बैंक हो।
कले निक्षेपका रुपमा रकम जम्मा गरी स्रोत जुटाउँछ। त्यस्तै ऋणपत्र जारी गरेर पनि रकम संकलन गर्दछ। संकलित रकम पूर्वाधारका क्षेत्रमा लगानी गर्छ।
आइपिओ निश्कासनपछि बैंकको चुक्ता पुँजी २० अर्ब हुनेछ। पहिलो त्रैमासिक वित्तीय विवरणअनुसार कम्पनीको प्रतिसेयर आम्दानी ६ रुपैयाँ छ। कम्पनीले सो अवधिमा १८ करोड रुपैयाँ खुद नाफा कमाएको छ।
आब ०७९/८० सम्म प्रतिसेयर नेटवर्थ ११२ रुपैयाँ पुग्ने कम्पनीको आँकलन छ। सो अवधिसम्म वार्षिक आम्दानी १ अर्ब ५९ करोड हुने र प्रतिसेयर आम्दानी ८ रुपैयाँ ८० पैसा पुग्ने कम्पनीको प्रक्षेपण छ।
इक्रा नेपालले कम्पनीको आइपिओलाई एनपी आईआर ट्रिपल बी रेटिङ्ग प्रदान गरेको छ। यसले कम्पनी तल्लो मध्यमस्तरको रहेको जनाउँछ।
४० प्रतिशत सेयर सर्वसाधारणलाई दिन लागिएको यो कम्पनीमा बाँकी ६० प्रतिशत स्वामित्व नेपाल सरकार, व्यवसायिक घराना र विभिन्न बैंक तथा वित्तीय संस्थाको छ।
यसको कार्यालय नयाँ बानेश्वरमा छ।
