बैंकहरुले दोस्रो त्रैमासिक वित्तीय सार्वजनिक गर्न थालेका छन्।
सेयर बजारमा लगानी गर्नेहरुका लागि वित्तीय विवरण नै मुख्य सूचनाको आधार हो। वित्तीय विवरणकै आधारमा कम्पनीको बिजनेस अवस्था थाहा हुन्छ।
कम्पनीको सेयर खरिद गरेपछि उसले दिन सक्ने प्रतिफल आँकलन गर्न पनि वित्तीय विवरण महत्वपूर्ण हुन्छ। बैंकले गत आर्थिक वर्षको नाफाबाट ८ प्रतिशत सेयर बोनस र ३ प्रतिशत नगद लाभांश प्रदान गरेको थियो।
यो वर्ष गत वर्षभन्दा धेरै लाभांश दिन सक्ला त? ६ महिनाको वित्तीय विवरण हेरेपछि केही हदसम्म आँकलन गर्न सकिन्छ। सो विवरणअनुसार बैंकको नाफा गत वर्षभन्दा २७ प्रतिशत बढेको देखिन्छ।
तसर्थ बैंकले यस वर्षको नाफाबाट आगामी दिनमा दिने लाभांश पक्कै बढ्न सक्ने अनुमान गर्न सकिन्छ। दोस्रो बजारमा हाल कम्पनीको मूल्य २९० देखि ३ सयको बीचमा छ।
तसर्थ कम्पनीको मूल्य आम्दानी अनुपातका आधारमा अन्य बैंकको तुलनामा सिटिजन्सको सेयर मूल्यमा हुने लगानी सस्तो र बढी प्रतिफलमूलक देखिन्छ।
सार्वजनिक दोस्रो त्रैमासिक वित्तीय विवरणअनुसार बैंकले ८७ करोड ५१ लाख रुपैयाँ खुद नाफा कमाएको छ। जवकि बैंकले गत वर्षको यस अवधिमा ६८ करोड ७७ लाख रुपैयाँ खुद नाफा कमाएको थियो। बैंकको खुद नाफा एक वर्षमा २७ प्रतिशतले बढेको हो।
बैंकको बिजनेस नै बढेपछि नाफामा उल्लेख्य सुधार देखिएको हो। बैंकले पुस मसान्तसम्म ८७ अर्ब ८७ करोड रुपैयाँ ऋण प्रवाह गरेको छ। जवकि गत वर्षको यसै अवधिमा ७८ अर्ब ९७ करोड रुपैयाँ प्रवाह गरेको थियो।
बैंकको निक्षेप संकलन १ खर्ब नाघेको छ। पुस मसान्तसम्म कुल १ खर्ब ५ अर्ब निक्षेप संकलन गरेको छ। जवकि गत वर्ष यस अवधिमा ८८ अर्ब ४९ करोड संकलन गरेको थियो। बैंकको चुक्ता पुँजी ९ अर्ब ८१ करोड रुपैयाँ रहेको छ।
बैंकको खुद नाफा बढेसँगै प्रतिसेयर आम्दानी पनि बढेर १७ रुपैयाँ ८३ पैसा पुगेको छ। गत वर्ष बैंकको प्रतिसेयर आम्दानी १५ रुपैयाँ ९५ पैसा थियो।
यद्यपि बैंकको निश्क्रिय कर्जा बढेको छ। गत वर्ष यस अवधिमा निश्क्रिय कर्जा ०.९९ प्रतिशत रहेकोमा अहिले २.४२ प्रतिशत पुगेको छ। कोरोना महामारीका कारण कतिपय उद्योगी व्यवसायीको कर्जा नियमित उठ्न नसकेपछि बैंकको निश्क्रिय कर्जामा ठूलै वृद्धि देखिएको हो।
अबको मुख्य चुनौति बैंकलाई निश्क्रिय कर्जा घटाउनु पर्ने देखिन्छ। बैंकको 'बिजनेस ग्रोथ' राम्रो देखिएकाले निश्क्रिय कर्जा घटाउन सकेमा नाफामा अझ टेवा पुग्नेछ।
त्यस्तै बैंंकको आधार दर भने घटेको छ। गत वर्ष यस अवधिमा बैंकको आधार दर १०. ३५ प्रतिशत रहेकोमा अहिले ८.२५ प्रतिशत कायम भएको छ। यसले गर्दा बैंकबाट ऋण लिनेहरुका लागि पनि ब्याजदर गतवर्षभन्दा कम पर्नेछ।
निक्षेपकर्तालाई दिने व्याजदर नै घटेपछि बैंकको आधार दर मात्रै होइन कोषमा लागत पनि घटेको छ। गत वर्ष यस्तो लागत दर ७. ९४ प्रतिशत रहेकोमा अहिले ६.३८ प्रतिशत कायम भएको छ।
बैंकको रिजर्भ ३ अर्ब ४३ करोड रुपैयाँको छ। रिजर्भको वृद्धिदर भने न्यून देखिन्छ। गत वर्ष रिजर्भ ३ अर्ब ३९ करोड रुपैयाँ थियो।
भैपरि आउन सक्ने जोखिम टार्नका लागि रिजर्भको आकार ठूलो हुनु जरुरी छ। साथै रिजर्भ ठूलो हुँदा यसबाट लगानीकर्तालाई सेयर बोनस दिएर पुँजी समेत बढाउन टेवा पुग्दछ।