सेयर बजारको परिसूचक नेप्सेले आइतबार २ हजार ४ सय अंक पार गरेको छ। परिसूचक बिहीबारको तुलनामा ५०.२० अंक बढेर २ हजार ४२४ अंकमा कायम भएको हो। आजको परिसूचक हालसम्मकै उच्च हो।
परिसूचकमा मात्रै नभई यस दिन कारोबार रकममा पनि उच्च रेकर्ड बढेको छ। कुल ९ अर्ब ३७ करोड ६० लाख रुपैयाँको सेयर किनबेच भएको छ।
यसअघि गत मंसिर १४ गते कारोबार रकममा ९ अर्ब २२ करोडको उच्च रेकर्ड बनेको थियो।
यसअघि शुक्रबार मात्रै नेपाल धितोपत्र बोर्डले नागरिक स्टक डिलरलाई सञ्चालनको अनुमति दिएको छ। स्टक डिलर भित्रिनुले पनि आजको बजार बढ्नमा मुख्य टेवा पुगेको हो।
कारोबार रकममा नयाँ रेकर्ड बनेकाले बजारमा नागरिक स्टक डिलरको प्रवेश भएको अनुमान छ। डिलरले मूल्य सस्तो हुँदा खरिद बढाउने र मूल्य बढ्दा आपूर्ति बढाएर बजारको उच्च उतारचढावलाई सन्तुलनमा राख्न मद्दत पुग्दछ।
यस दिन ब्यापार बाहेकका सबै समूह बढेका छन्। सो समूह ७३ अंकले घटेको छ।
बैंकिङ २१, होटल २४, विकास बैंक २०, जलविद्युत ५१, फाइनान्स १४, निर्जीवन बीमा २२१, उत्पादन ५१, अन्य १०४, माइक्रोफाइनान्स १०२ र जीवन बीमा १६५ अंकले बढेको छ।
यस दिन एक दर्जन बढी कम्पनीको सेयर हुने लगानीकर्ताले १० प्रतिशतको हाराहारीमा नाफा कमाएका छन्।
पोखरा फाइनान्स, गुराँस लाइफ इन्स्योरेन्स, ग्रामीण विकास लघुवित्त र मिथिला लघुवित्तको मूल्य १० प्रतिशतले बढेको छ।
गुँरास लघुवित्त, नागरिक लगानी कोष, एनसिसी बैंक, सपोर्ट माइक्रोफाइनान्स, रिडी हाइड्रोपावर, आइएमई जनरल इन्स्योरेन्स, प्रभु लाइफ इन्स्योरेन्स, माउन्टेन इनर्जी नेपाल र एचआइडिसिएल मूल्य साढे ९ प्रतिशतभन्दा धेरैले बढ्यो।
एनसिसी बैंकको नविलसँग मर्ज हुने चर्चा चलेपछि बजारमा कम्पनीको मूल्य १० प्रतिशत बढ्दा पनि खरिद गर्न चाहनेले किन्न पाएका छैनन्।
स्रोतलाई हवाला दिँदै विभिन्न अनलाइन सञ्चारमाध्यमले नविलसँग एनसिसीको मर्ज हुने समाचार लेखेका छन्। जसले गर्दा आज मूल्यमा उच्च वृद्धि देखिएको हो।
नारायणी डेभलपमेन्ट बैंकको मूल्य सबैभन्दा धेरै १० प्रतिशतले घट्यो। त्यस्तै एनआइबिएल प्रगति फण्डको मूल्य करिब ५ प्रतिशतले घट्यो।
कारोबारका आधारमा नेपाल लाइफ इन्स्योरेन्स अग्रस्थानमा रह्यो। सो कम्पनीको ६६ करोड रुपैयाँ बराबरको कारोबार हुँदा मूल्य भने प्रतिकित्ता ५९ रुपैयाँ घटेर २८४९ रुपैयाँ कायम भयो।
त्यस्तै पुनर्बीमा कम्पनीको ३४ करोड रुपैयाँ बराबरको कारोबार हुँदा मूल्य प्रतिकित्ता ६१ रुपैयाँ बढेर १५७६ रुपैयाँ कायम भयो।
टेलिकमको ३१ करोड रुपैयाँ बराबरको कारोबार हुँदा मूल्य ५४ रुपैयाँ बढेर १३९६ रुपैयाँ कायम भएको छ।