नेपाल राष्ट्र बैंकले ७ वर्षे अवधिको लागि १० अर्बको विकास ऋणपत्र जारी गर्न खोज्दा ७१ अर्ब २८ करोड रुपैयाँको आवेदन परेको छ।
विभिन्न बैंक तथा वित्तीय संस्थाहरुमा अधिक तरलता थुप्रिएपछि विकास ऋणपत्रमा आकर्षण देखिएको हो। राष्ट्र बैंकले बोलकबोलका माध्यमबाट ३.८८ प्रतिशतसम्म ब्याज दिनेगरी १० अर्बको ऋणपत्र स्वीकृत गरेको छ।
५० वटा बैंक तथा वित्तीय संस्था र एक बीमा कम्पनीले विकास ऋणपत्रमा सहभागिता जनाएका थिए।
सो ऋणपत्रको साँवा २०८४ माघ १४ गते भुक्तानी हुनेछ। बैंक तथा वित्तीय संस्थाहरुले अर्धवार्षिक रुपमा तोकिएको ब्याजदर पाउने छन्।
७ वाणिज्य बैंक, ५ विकास बैंक, ५ फाइनान्स गरी कुल १७ वटा बैंक तथा वित्तीय संस्थाहरु विकास ऋणपत्रका लागि स्वीकृत भएका छन्।
विकास ऋणपत्र सरकारले उठाउने एक आन्तरिक ऋण हो।
राष्ट्र बैंकमार्फत यस्तो ऋणपत्र जारी हुन्छ र विभिन्न बैंक तथा वित्तीय संस्थाहरुले ऋणपत्र खरिदका लागि सहभागिता जनाउँछन्।
कम ब्याजमा प्रस्ताव गर्नेलाई प्राथमिकता दिई राष्ट्र बैंकले बोलकबोलका माध्यमबाट ऋणपत्र प्रदान गर्दछ। सो ऋणपत्रबाट प्राप्त रकम सरकारले विभिन्न आयोजनाको निर्माणमा खर्चिन्छ।
