राष्ट्र बैंकले खोलेको नागरिक बचतपत्रमा सर्वसाधारणको आकर्षण देखिएको छ।
मागेजति आवेदन परेपछि बीचमै आवेदन लिने कार्य बन्द गरिएको छ। यसमा आवेदन दिने अन्तिम म्याद फागुन १८ गतेसम्म तोकिएको थियो।
राष्ट्र बैंकका प्रवक्ता डा. गुणाकर भट्टले २ अर्ब २२ लाख ९५ हजार रुपैयाँका लागि आवेदन परेको जानकारी दिए। ‘मागेजति आवेदन परेपछि नागरिक बचतपत्र बन्द गरेका हौं’ उनले भने।
बैंकले २ अर्ब रुपैयाँको बचतपत्र निष्कासन गरेको थियो। ५ वर्षे अवधिको सो बचतपत्रमा आवेदन पर्याप्त परिसकेकाले फागुन १३ गतेदेखि बिक्री बन्द भएको राष्ट्र बैंकले सार्वजनिक गरेको सूचनामा जनाइएको छ।
‘नागरिक बचतपत्र २०८२ क’ नामको यो बचतपत्रमा लगानी गर्नेले ९ प्रतिशत ब्याज पाउँछन्। जुन दर हाल वाणिज्य बैंकहरुले मुद्दती खातामा दिएको ब्याजभन्दा बढी हो।
बैंकहरूले दिएको ब्याजभन्दा धेरै भएपछि यसमा आकर्षण देखिएको हो।
हाल वाणिज्य बैंकहरुले मुद्दती निक्षेपमा ७.२५ र केहीले बढीमा ८ प्रतिशतसम्म ब्याज दिइरहेका छन्। लगानी गर्नेले ६–६ महिनामा ब्याज पाउने छन्। ५ वर्षपछि साँवा रकम फिर्ता हुनेछ।
राष्ट्र बैंकले जारी गर्ने यो बचतपत्रमा जोखिम कम हुन्छ। सरकारले आन्तरिक ऋण उठाउन राष्ट्र बैंकमार्फत यस्तो बचतपत्र निष्कासन गर्ने गरेको छ।
यदि रीतपूर्वक पेश नभई आवेदन अस्वीकृत भएमा सोको रकम ७ दिनभित्रै फिर्ता हुनेछ। आवेदन स्वीकृत भएपछि राष्ट्र बैंकले सोको प्रमाणपत्र दिनेछ।