आवेदकले सिधै अनलाइनबाट प्राथमिक सेयर भर्ने एक मात्रै विकल्प मेरो सेयर हो। सिडिएससीले सञ्चालनमा ल्याएको मेरो सेयरमा बारम्बार समस्या आउने गरेको छ।
शुक्रबारदेखि ज्योति लाइफ इन्स्योरेन्सको आइपिओ खुलेको छ। तर यसै दिन मेरो सेयरबाट आवेदन दिन खोज्ने हजारौं आवेदकले समस्या ब्यहोर्नुपर्यो।
‘यो बारम्बार आउने गरेको समस्या हो, सिडिएससीलाई यसबारे राम्ररी थाहा छ’ सेयर लगानीकर्ता मनोहर तिम्सिनाले भने। सुरुका दिन लोड बढी हुने भएकाले सामान्य समस्या आएको हुन सक्ने सिडिएससीका प्रवक्ता सुरेश न्यौपाने बताउँछन्।
उनले भने ‘लोड अत्याधिक भएकाले साइट नखुलेको मात्रै हो’ उनले सेतोपाटीसँगको कुराकानीमा भने ‘तर आवेदकले भर्नै नपाएको अवस्था होइन, अहिले आवेदन परिरहेको छ।’
सामान्य अवस्थामा १५ देखि २० हजारले मेरो सेयर चलाउने गरे पनि आइपिओ खुलेका दिन एकै पटक ५० हजारभन्दा धेरैले चलाउने गरेको सिडिएससीले जनाएको छ।
मेरो सेयरका अलवा आस्बा सदस्य बैंक तथा वित्तीय संस्थाका शाखाहरुबाट पनि आवेदन दिन सकिनेछ।
आजदेखि ज्योति लाइफ इन्स्योरेन्स कम्पनीले जारी पुँजी २ अर्ब २० करोड रुपैयाँको ३० प्रतिशतले हुन आउने ६६ करोड रुपैयाँ बराबरको साधारण सेयर निष्कासन गर्न लागेको हो।
अंकित मूल्य १ सयका दरले ६६ लाख कित्ता सेयर जारी हुनेछ। जसमध्ये कर्मचारी र सामुहिक लगानी कोषका लागि छुट्याएपछि बाँकी रहेको ५९ लाख ४० हजार कित्ता सेयर सर्वसाधारणका लागि निष्कासन हुनेछ।
आइपिओ भर्नेमध्ये ५ लाख ९४ हजार जनाले १० कित्ताका दरले पाउने छन्। पछिल्लो समय आइपिओ भर्नेको संख्या १५ लाख नाघ्ने गरेको छ, यस हिसावमा यो कम्पनीमा आवेदन दिनेमध्ये ९ लाख भन्दा धेरैको हात रित्तो हुनेछ।
आइपिओमा न्यूनतम १० कित्ता र अधिकतम ६६ हजार कित्तासम्मका लागि आवेदन दिन पाइनेछ। फागुन २६ गतेसम्म यसमा आवेदन दिन सकिनेछ।
