लघुवित्तको प्राथमिक सेयर (आइपिओ) पर्नु भनेको चिठ्ठा पर्नुसरह हो।
करिब १७ लाखले आइपिओ भर्ने गर्छन्, तर लघुवित्त कम्पनीको आइपिओ हात पार्नेको संख्या जम्मा ३५–४० हजार मात्रै हुन्छ, त्यो पनि १० कित्ता। अर्थात लघुवित्त कम्पनीको आइपिओ भरेकामध्ये २ प्रतिशत मात्रै ‘भाग्यमानी’ सावित हुने गर्छन्।
सेयर संख्या एकदमै न्युन हुने भएकाले आपूर्ति कम हुँदा लघुवित्त कम्पनीको बजार मूल्य उच्च हुने गर्छ। यद्यपि कतिपय लघुवित्त कम्पनीको वित्तीय विवरण पनि राम्रो छ। तीमध्येकै एक कम्पनी हो- बजारमा हालै सूचीकृत महिला लघुवित्त।
१० करोड चुक्ता पुँजी रहेको महिला लघुवित्तको जगेडा कोष १९ करोड १८ लाख रुपैयाँको छ। कम्पनीले चैत मसान्तसम्म ६ करोड ४२ लाख खुद नाफा कमाएको छ। कम्पनीको प्रतिसेयर आम्दानी ८५ रुपैयाँ ६६ पैसा छ।
यो कम्पनीको गत फागुन १४ गते मात्रै प्राथमिक सेयर आइपिओ बाँडफाँड भएको हो। ३७ हजार ४ सय जनाले १० कित्ताका दरले सेयर पाएका हुन्। ठीक ६६ दिनपछि आज मंगलबार कम्पनीको सेयर प्रतिकित्ता ४ हजार १ सय ५८ रुपैयाँ पुगेको छ।
केही दिनयता कम्पनीको मूल्य दैनिक १० प्रतिशतका दरले बढ्दै गएको छ। आज पनि मूल्य १० प्रतिशत बढेको हो।
मंगलबार प्रतिकित्ता ४ हजार १५८ रुपैयाँ मूल्य तिरेर सेयर किन्न अर्डर पोष्ट गरेकाले पनि पाउन सकेका छैनन्। १ बजेसम्म करिब १ लाख कित्ता अर्डर खरिदका लागि पोष्ट भएको छ।
६६ दिनअघि १ हजार रुपैयाँ लगानी गरेर १० कित्ता सेयर पाएका लगानीकर्ताको सम्पत्ति मूल्य मंगलबार ४१ हजार ५८० रुपैयाँ पुगेको छ। यस दिन सो सेयर बेच्नेले (तिर्नुपर्ने कर र कमिसनबाहेक) ४० हजार खुद नाफा कमाए।
बैंक तथा वित्तीय संस्थाहरुले अंकित मूल्य १ सयमै आइपिओ जारी गर्ने गरेका छन्। रियल सेक्टरलाई लक्षित गर्दै धितोपत्र बोर्डले अंकित मूल्यमा प्रिमियम रकम थपेर पनि आइपिओ ल्याउन पाउने व्यवस्था गरेको छ।
तर संचालनमा आएर नाफा कमाइरहेका लघुवित्त कम्पनीको आइपिओ १ सय रुपैयाँमै पाइन्छ।
