हिमालयन र नेपाल इन्भेष्टमेन्ट बैंकबीच मर्जका लागि दुबैतर्फको बोर्ड बैठकले मर्जर कमिटीको निर्णय स्वीकार गरेको छ।
अर्थात अब दुवै बैंकबीच मर्जका लागि कुनै विवाद छैन, मात्रै सम्झौता पत्रमा हस्ताक्षर (एमओयू) हुन बाँकी छ। स्रोतका अनुसार सबै कुरा मिलेको छ, तर हबिबको सेयर टुंगो नलाग्दा ढिला भएको छ।
हिमालयन बैंकमा हाल पाकिस्तानको हबिब बैंकको २० प्रतिशत संस्थापक सेयर छ। हबिबले सो सेयर तत्काल बिक्री भएको सुनिश्चितता चाहन्छ।
हबिब बैंकको सेयर बिक्रीको सुनिश्चितता नहुँदा इन्भेष्टमेन्टसँग मर्ज प्रक्रिया अड्किएको छ। मर्ज सम्झौतापछि केही महिना सेयर कारोबार रोकिन्छ। हबिबले जतिसक्दो चाँडो मर्जअघि नै सेयर बिक्री गर्न खोजेको छ।
सो सेयर खरिदका लागि हालका हिमालयन बैंकका संस्थापक सेयरधनीलाई नै पहिलो अधिकार हुन्छ। तर संस्थापकहरु कसले कति सेयर लिने भन्ने टुंगो लागेको छैन। जसले गर्दा सबै कुरा मिलेर पनि मर्जका लागि सम्झौता हुन नसकेको स्रोतले जनाएको छ।
‘हबिबको सेयर बिक्रीको टुंगो लगाइहाल्ने, त्यसपछि एमओयू गर्ने तयारी हो’ एक उच्च अधिकारीले भने ‘हबिबको सेयर संस्थापकहरु कसले कति लिने र बाँकी रहेको सेयर कसरी बिक्री गर्ने भन्ने छलफल चलिरहेको छ।’
उनका अनुसार यो साताभित्र सो विषयमा सुनिश्चितता गरिसकेपछि संभवत अर्को साता एमओयू हुनेछ।
हबिबले प्रतिकित्ता २८२ रुपैयाँ ५० पैसाका दरले ६ अर्ब बढीको आफ्नो सेयर बिक्री गर्न खोजेको छ। २ करोड १३ लाख ६८ हजार ८०१ कित्ता संस्थापक सेयर बिक्री गरेर हबिबले करिब ६ अर्ब ४ करोड रुपैयाँ रकम लैजाँदै छ।
अहिलेसम्म हबिबको सबै सेयर हालका संस्थापकहरुले मात्रै सकार्ने अवस्था देखिएको छैन। जसले गर्दा बीचमा इन्भेष्टमेन्ट कम्पनी खडा गरेर सोमार्फत पनि खरिद हुन सक्छ।
मर्जका लागि सबै कुरा मिलिसक्यो
मर्जका लागि सबै विषयले टुंगो पाइसकेको छ। मोटामोटी रुपमा कर्मचारी व्यवस्थापन, स्वाप रेसियो, संचालक समिति, माथिल्लो व्यवस्थापन टिम लगायतका विषय मिलिसकेको छ।
मिलेका विषयमा मर्जपछि बैंकको नाम ‘हिमालयन एण्ड नेपाल इन्भेष्टमेन्ट बैंक’ रहनेछ। बैंकको अध्यक्षमा हालका इन्भेष्टमेन्टका अध्यक्ष पृथ्वीबहादुर पाण्डे रहनेछन्।
त्यस्तै प्रमुख कार्यकारी अधिकृत (सिइओ) हिमालयन बैंकका हालका अशोक शमशेर राणा नै रहनेछन्। उनीपछिको कार्यकाल इन्भेष्टमेन्टका हालका ज्योति पाण्डेले सम्हाल्नेछन्।
स्वाप रेसियो १ बराबर १ नै हुनेछ। यसको अर्थ हिमालयन वा इन्भेष्टमेन्ट बैंकको जति कित्ता सेयर लगानीकर्तासँग छ, मर्जपछि बन्ने बैंक ‘हिमालयन एण्ड नेपाल इन्भेष्टमेन्ट’को सेयर पनि त्यति नै हुनेछ।
‘यसअघि मर्जर कमिटीले गरेका निर्णयलाई दुबै बैंकको बोर्ड बैठकले सदर गरेको अवस्था छ, एमओयू रोक्नुपर्नेगरी कुनै पनि विषयमा विवाद छैन, मात्रै अहिले हबिबको सेयर बिक्री सुनिश्चित होस् भन्ने हो’ एक अधिकारीले भने।