मंगलबार सेयर बजारको परिसूचक नेप्से २७ अंकले बढेको छ। सो अंकको वृद्धिसँगै परिसूचक २६७३ अंकमा पुगेको छ।
यस दिन कारोबार रकममा पनि सुधार आएको छ। ५ अर्ब ८१ करोड रुपैयाँको कारोबार भएको छ। सबै समूहमा हरियाली छाएको छ।
बैंकिङ ३, ब्यापार २२१, होटल तथा पर्यटन २३, विकास बैंक १५, जलविद्युत २१, फाइनान्स १७, निर्जीवन बीमा १७६, उत्पादन १३९, अन्य ५३, माइक्रोफाइनान्स ६५ र जीवन बीमा २६७ अंकले बढे।
कारोबारका आधारमा नेपाल पुनर्बीमा कम्पनी अग्रस्थानमा रह्यो। सो कम्पनीको ७६ करोड रुपैयाँ बराबरको कारोबार हुँदा दोस्रोमा रहेको अपि पावरको २० करोडको सेयर किनबेच भयो।
त्यस्तै शिवम् सिमेन्ट, जलविद्युत लगानी तथा विकास कम्पनी र एनआरएन इन्फ्रास्ट्रक्चर पनि कारोबारका आधारमा टप फाइभमा पर्न सफल भए।
४ कम्पनीको मूल्य १० प्रतिशतले बढेको छ। बोटलर्स नेपाल, रुरु जलविद्युत परियोजना, युनाइटेड मोदी हाइड्रोपावर र गुहेश्वरी मर्चेन्ट बैंकिङको मूल्य १० प्रतिशतले बढेको हो।
मूल्य बढेपछि बोटलर्सको प्रतिकित्ता १००६५, रुरुको ६६२, युनाइटेड मोदीको २५५ र गुहेश्वरीको २७८ रुपैयाँ पुगेको छ।
त्यस्तै समता माइक्रोफाइनान्सको मूल्य ९ प्रतिशतले बढेको छ। यस दिन पनि विशाल बजार कम्पनीको मूल्य १० प्रतिशतले घटेको छ। सो दरमा घटेर मूल्य प्रतिकित्ता ४८९७ मा झरेको छ।
सोबाहेक घट्ने अरु कम्पनीको मूल्य ३ प्रतिशतभन्दा कममै सीमित रह्यो।