निषेधाज्ञा अवधिमा बैंकको मुद्दती खाता नवीकरण इमेलबाटै गर्न सकिने भएको छ।
नेपाल बैंकर्स एसोसिएसनले एक विज्ञप्ति जारी गर्दै निषेधाज्ञा अवधिभर मुद्दती खाता नवीकरण सम्बन्धित बैंकलाई इमेल मार्फत अनुरोध गर्न आग्रह गरेको छ।
साथै, कुनै परिस्थितिवस इमेल गर्न नसकिएको खण्डमा निषेधाज्ञा समाप्त भएको ७ दिन पछिसम्म मुद्दती परिपक्व भएको मितिबाट नै लागू हुने गरी नवीकरण गर्न सकिने संघले जनाएको छ।
निषेधाज्ञामा कतिपय मुद्दती खाता नवीकरण गर्नकै लागि बैंकमा जाने गरेका छन्। सीमित शाखाहरु मात्रै खुल्दा बैंकमा सर्वसाधारणको उल्लेख्य उपस्थिति हुने गरेको छ। यसैलाई मध्यनजर गर्दै बैंकर्स एसोसिएसनले बैंकिङ्ग कारोबार घरैबाट गर्नका निमित्त अनुरोध समेत गरेको छ।
मोबाइल तथा इन्टरनेट बैंकिङ्ग मार्फत एक खाताबाट अर्कोमा रकम स्थानान्तरण, खाता व्यालेन्स हेर्ने, विभिन्न बिल भुक्तानीहरु लगायतका कार्यहरु गर्न सकिने जनाउँदै एसोसिएसनले सकभर बैंकमा उपस्थित नहुन आग्रह गरेको छ।
साथै, सामान खरिद गर्दाका वखत समेत उपलब्ध भएसम्म कार्डको प्रयोग तथा क्यूआर मार्फत भुक्तानी गरी सकेसम्म नगद कारोवार कम गर्न एसोसिएसनले भनेको छ।
बैंकिङ्ग कारोवार वा बैंकसंग सम्बन्धित अन्य कुनै सेवा, सुझाब, गुनासो भएको खण्डमा बैंकको वेबसाइटमा सम्बन्धित अधिकारीको सम्पर्क नम्बर राखिएको तथा कल सेन्टर सेवा समेत उपलब्ध भएको बैंकर्स एसोसिएसनले जनाएको छ। बैंकमा भीड कम होस् भन्नका लागि बैंकहरुले ५ सेवा मात्रै सञ्चालनमा ल्याएका छन्।
जसअनुसार खाताबाट नगद झिक्ने, ५० हजारभन्दा बढी नगद जम्मा गर्ने, चेकरआइपिएसरआरटिजिएसमार्फत रकम स्थानान्तरण गर्ने, रेमिट्यान्स भुक्तानी र अन्तर्राष्ट्रिय व्यापारसम्वन्धी सेवाहरु मात्रै प्रदान हुने भएको छ।
संघले अत्यावश्यकबाहेक साधारण कार्यका लागि अहिले बैंकमा नआउन पनि सर्वसाधारणलाई आग्रह गरेको छ।