चालु आर्थिक वर्षको पहिलो १० महिना (साउनदेखि वैशाखसम्म)मा नेपाल भित्रिएको रेमिट्यान्स गत वर्षको सोही अवधिको तुलनामा १९.२ प्रतिशतले बढेको छ।
नेपाल राष्ट्र बैंकले सार्वजनिक गरेको १० महिनाको वित्तीय स्थितिअनुसार चालु आवको १० महिनामा ८ खर्ब ९ अर्ब रुपैयाँ रेमिट्यान्स भित्रिएको छ।
गत वर्ष यस अवधिमा घटेको रेमिट्यान्स यो अवधिमा १९ प्रतिशतले बढ्नुमा औपचारिक माध्यमको प्रयोग बढ्नु मुख्य कारण हो।
त्यस्तै यो आवको १० महिनामा गत आवको सोही अवधिमा भन्दा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ६०.३ प्रतिशतले घटेको छ।
अन्य देशसँग नेपालको व्यापार अवस्था
यो दश महिनामा मुलुकको कुल व्यापार घाटा ११ खर्ब ४५ अर्ब रहेको छ। गत वर्षको साेही अवधिको तुलनामा यस्तो घाटा २१.५ प्रतिशतले बढेको हो। अघिल्लो वर्षको सोही अवधिमा यस्तो घाटा १४.२ प्रतिशतले घटेको थियो।
दश महिनामा कुल १ खर्ब ८ अर्ब रुपैयाँको स्वदेशी सामान निर्यात भएको छ। गत वर्षको यसै अवधिको तुलनामा वस्तु निर्यात ३२.२ प्रतिशतले बढेको हो।
अघिल्लो वर्षको सोही अवधिमा यस्तो निर्यात ४.५ प्रतिशतले बढेको थियो। गन्तव्यका आधारमा भारत तथा अन्य मुलुकतर्फ क्रमशः ३५.८ प्रतिशत र २५.३ प्रतिशतले निर्यात वृद्धि भएको छ भने चीनतर्फको निर्यातमा १८.४ प्रतिशतले कमी आएको छ।
वस्तुगत आधारमा सोयाविन तेल, अलैंची, जुटका सामान, धागो (पोलिष्टर तथा अन्य), ऊनी गलैंचा लगायतका वस्तुको निर्यात बढेको छ भने पाम तेल, दाल, जस्तापाता, तार, चोकर लगायतका वस्तुको निर्यात घटेको छ।
यो १० महिनाको अवधिमा कुल १२ खर्ब ५४ अर्ब रुपैयाँको विदेशी वस्तु भित्रिएको छ। समीक्षा अवधिमा वस्तु आयात २२.३ प्रतिशतले बढेको हो।
अघिल्लो वर्षको सोही अवधिमा यस्तो आयात १३.० प्रतिशतले घटेको थियो। वस्तु आयात गरिने मुलुकका आधारमा भारत, चीन तथा अन्य मुलुकबाट भएको आयात क्रमशः २९.८ प्रतिशत, १७.२ प्रतिशत र ६.२ प्रतिशतले वृद्धि भएको छ।
वस्तुगत आधारमा यातायातका साधन तथा पार्टपुर्जा, कच्चा सोयाविन तेल, एम.एस. बिलेट, चामल, दूरसंचारका उपकरण तथा पार्टपुर्जा लगायतका वस्तुको आयात बढेको छ भने हवाईजहाजका पार्टपुर्जा, कच्चा पाम तेल, पेट्रोलियम पदार्थ, भिडियो, टेलिभिजन तथा पार्टपूजा, चाँदी लगायतका वस्तुको आयात घटेको छ ।