साता कारोबारको अन्तिम दिन बिहीबार सेयर कारोबार रकमसँगै परिसूचक सामान्य बढेको छ। यस दिन अघिल्लो दिनको तुलनामा डेढ अर्बभन्दा धेरैले कारोबार रकम बढेको छ।
हिजो ६ अर्ब १७ करोड रुपैयाँको सेयर किनबेच भएकोमा आज ७ अर्ब ७२ करोडको कारोबार भयो। नेप्से परिसूचक भने जम्मा २.७ अंकले मात्रै बढेको छ। यसअघि हिजो १०४ अंकले बजार बढेको थियो। सो अंकको वृद्धिपछि परिसूचक २८१९ अंकमा कायम भएको छ।
परिसूचकमा सामान्य अंक बढे पनि बैंकिङ समूहले भने दोहोरो अंकको छलाङ मारेको छ। सो समूह ४७ अंक बढेको छ। सोबाहेक फाइनान्स समूह ८ अंकले बढ्यो।
ब्यापार ४५, होटल तथा पर्यटन ९७, विकास बैंक ८०, जलविद्युत ७१, निर्जीवन बीमा ९२, उत्पादन ८०, अन्य २१, माइक्रोफाइनान्स ४६, जीवन बीमा ५१ र लगानी समूह २ अंकले घटे।
मनकामना स्मार्ट लघुवित्तको मूल्य १० प्रतिशतले बढेको छ। सो मूल्यवृद्धिपछि कम्पनीको मूल्य १३१७ रुपैयाँ कायम भएको छ।
प्राइम लाइफ इन्स्योरेन्सको मूल्य ६ प्रतिशतले बढेको छ। बैंकमा नेपाल बैंकको मूल्य सबैभन्दा धेरै ५.५ प्रतिशतले बढेको छ। नेपाल बंगलादेश बैंकको ५.३ प्रतिशतले मूल्य बढ्यो।
यस दिन गुमाउनेमा हिमालयन पावर पार्टरका लगानीकर्ता अगाडि रहे। सो कम्पनीको मूल्य ५ प्रतिशतले घट्यो।
युनियन हाइड्रोपावरको मूल्य पनि ५ प्रतिशतले घट्यो। कारोबारका आधारमा सानिमा बैंक अग्रस्थानमा रह्यो। सो कम्पनीको ३४ करोड रुपैयाँको सेयर किनबेच भयो। नेपाल बैंकको २७ करोडको कारोबार भयो।
