सेयर बजारका प्रमुख १० कम्पनीमा लगानीकर्ताले एक महिनामै १६ अर्ब रूपैयाँ गुमाएका छन्।
चैत अन्त्यमा यी १० कम्पनीहरूको कुल बजार पुँजीकरण १० खर्ब २८ अर्ब रहेकोमा वैशाख अन्त्यमा आइपुग्दा १० खर्ब १२ अर्बमा सीमित भएको नेप्सेको मासिक तथ्यांकले देखाउँछ।
यसरी सबैभन्दा धेरै गुमाउनेमा नबिल बैंक लिमिटेड छ। बैंकको सेयर रहेका लगानीकर्ताहरूसँग चैत अन्त्यमा एक खर्ब ७९ अर्ब सेयर सम्पति रहेकोमा वैशाख अन्त्यमा एक खर्ब ७२ अर्ब रूपैयाँमा सीमित भएको छ।
प्रतिशतका आधारमा भने नेपाल पुनर्बीमा कम्पनीमा रहेको लगानीकर्ताहरूको सम्पति धेरैले घटेको छ। वैशाखमा यस्तो सेयर सम्पति ४.८४ प्रतिशतले घटेर एक खर्ब १४ अर्बमा सीमित भएको छ।
एनआइसी एशिया बैंकका लगानीकर्ताहरूको वैशाखमा करिब ७ प्रतिशतले सेयर सम्पति बढेर ९३ अर्ब रूपैयाँ पुगेको छ। चैत अन्त्यमा बैंकको सेयर रकमका आधारमा कुल बजार पुँजीकरण ८७ अर्ब रूपैयाँ थियो।
यससँगै एनआइसी एशिया बजार पुँजीकरणको आधारमा एक तह उक्लिएर चौथो स्थानमा आइपुगेको छ। यसअघि नागारिक लगानी कोष भने चौथो स्थानमा र एनआइसी एशिया पाँचौं स्थानमा थियो। नागरिक लगानी कोष अहिले पाँचौं स्थानमा छ।