नेपाल लाइफ इन्स्योरेन्सको सेयर मूल्य १० वर्ष यताकै न्यूनमा आएपनि लगानीकर्ताहरूले कम्पनीको सेयर उच्च दरले बिक्री बढाएका छन्। कम्पनीले सार्वजनिक गरेको चौथो त्रैमाशिक वित्तीय विवरण अनुसार ३५ करोड रूपैयाँ घाटामा छ।
आइतबार न्यूनतम ६४७ रुपैयाँसम्ममा कम्पनीको सेयर आएको हो। एकैदिनमा कम्पनीको ११ करोड रुपैयाँको कारोबार भएको छ। यो मूल्य अघिल्लो दिनको तलनामा ५.७५ प्रतिशतले घटेको हो।
बजारमा कारोबार भएको कुल रकम १ अर्ब ८७ करोड रुपैयाँमध्ये यस कम्पनीको मात्रै करिब ६ प्रतिशतको कारोबार भएको छ। कम्पनीको मूल्य यसअघि पनि ७०० रुपैयाँको हाराहारीसम्म आएपनि १० वर्षपछि बल्ल आइतबार ६९८ रुपैयाँ मुनि झरेकाे हाे।
२०६९ वैशाख ४ मा कम्पनीको मूल्य ७०० रुपैयाँ मुनि थियो त्यसयता यो तहमा मूल्य झरेको थिएन। कम्पनीको अधिकतम मूल्य ५ हजार ५७० रुपैयाँ सम्ममा पुगेको रेकर्ड छ। २०७० चैतमा यो तहमा मूल्य थियो।
यस दिन सर्वाधिक सेयर खरिद–बिक्री हिमालयन डिष्टिलरीको भएको छ। कम्पनीको १६ करोड ५३ लाख रुपैयाँ बराबरको सेयर खरिद–बिक्री भएको हो। सो कम्पनीको सेयर मूल्य प्रतिकित्ता तीन हजार ५२६ रुपैयाँ कायम भएको छ।
आइतबार नेप्से परिसूचक भने २७.९२ अंकले घटेको छ। यस दिन नेप्से परिसूचक १.३७ प्रतिशतले घटेर २०१०.०१ बिन्दुमा पुगेर बन्द भएको छ।
आज कारोबारमा आएका २२७ वटा धितोपत्र तथा ऋणपत्रको ४५ लाख ५९ हजार २२ कित्ता सेयरको १ अर्ब ८७ करोड ३२ लाख ८१ हजार ८९७ रुपैयाँ बराबरको सेयर खरिद–बिक्री भएको छ।
आइतबार अपर हेवाखोला हाइड्रोपावरको सेयर मूल्य सर्वाधिक ८.१० प्रतिशतले बढेर प्रतिकित्ता मूल्य १५४ रुपैयाँ कायम भएको छ।
त्यस्तै, कालिका पावरको सेयर मूल्य २.८८ प्रतिशतले बढेर प्रतिकित्ता मूल्य ४१५ रुपैयाँ कायम भएको छ।
यस दिन सेयर मूल्य सर्वाधिक घट्नेमा गुराँस लघुवित्त र हिमालयन डिष्टिलरी रहेको छ। गुराँस लघुवित्तको सेयर मूल्य ७.०९ र हिमालयन डिष्टिलरीको सेयर मूल्य ६.१० प्रतिशतले घटेर अन्तिम मूल्य क्रमशः एक हजार ७४ रुपैयाँ र तीन हजार ५२६ रुपैयाँ कायम भएको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक घट्दा समग्र नेप्से घटेको हो।
यस दिन उत्पादन तथा प्रशोधन समूहको परिसूचक सर्वाधिक ३.५८ प्रतिशतले घटेको छ।
त्यस्तै, व्यापार, वित्त, जीवन बीमा र लगानी समूहको परिसूचक २ प्रतिशतभन्दा बढीले घटेको छ।
त्यसैगरी, विकास बैंक, जलविद्युत, अन्य र लघुवित्त समूहको परिसूचक १ प्रतिशतभन्दा धेरैले घटेको छ।