राष्ट्र बैंकले आन्तरिक ऋण उठाउने उद्देश्यको लागि जारी गर्ने ट्रेजरी बिल्स (सरकारी ऋणपत्र) मा बैंकहरूले उच्च ब्याजदर प्रस्ताव गरेर ब्याजदर बढाउन थालेपछि राष्ट्र बैंक आफैले यस्तो ऋणपत्र खरिद गरेर ब्याजदर घटाएको छ।
साउन ३० गते (सोमबार) एकै दिन १३ अर्ब रुपैयाँको ट्रेजरी बिल्स बोलकबोल गरेकोमा ११ अर्ब ६६ करोड रुपैयाँ बराबरको खरिददारी राष्ट्र बैंक आफैंले गरेको छ।
राष्ट्र बैंकले २८ दिने अवधिको पाँच अर्ब रूपैयाँ, ९१ दिने अवधिको दुई अर्ब रूपैयाँ र एक सय ८२ दिने अवधिको ६ अर्ब रूपैयाँ बराबरको ट्रेजरी बिल्स जारी गरेको थियो।
यसमा २८ दिने अवधिको ट्रेजरी बिल्सको औसत ब्याजदर ८.९९ प्रतिशत, ९१ दिने अवधिको ९.५० प्रतिशत र एक सय ८२ दिने अवधिको ९.८९ प्रतिशत ब्याजदर कायम भएको छ। केही समयअघि यसको ब्याजदर औसतमै १२ प्रतिशत पुगेको थियो।
अधिकतम ब्याजदर पाउने भएपछि बैंकहरू अनावश्यक कर्जा लगानीमा निरुत्साहित हुने भन्दै राष्ट्र बैंकले सुरूमा बैंकहरूले मागेकै ब्याज दिने रणनीति अपनाएको थियो।
तर, सरकारको लागि उठाइने यस्तो ऋणमा ब्याजदरको भार समेत सरकारमा पर्ने भन्दै यो नीतिको आलोचना भएपछि राष्ट्र बैंक आफैले ट्रेजरी बिल्स खरिद गर्न थालेको हो।
राष्ट्र बैंकले हालसम्म आफैंले कुल २८ अर्ब पाँच करोड रूपैयाँ बराबरको ट्रेजरी बिल्स किनिसकेको छ।