हाल धितोपत्र बोर्डमा पाँच वटा उत्पादनमूलक समूहका कम्पनीहरूले आइपिओ (प्राथमिक सेयर) जारी गर्न आवेदन दिएका छन्।
सर्वोत्तम सिमेन्ट, घोराही सिमेन्ट, मुक्तिनाथ कृषि कम्पनी, रिलायन्स स्पिनिङ मिल्स र सोनापुर मिनिरल्स एण्ड आयलले आइपिओ जारी गर्ने अनुमति मागेका हुन्।
सर्वोत्तम सिमेन्ट र रिलायन्स स्पिनिङले बुक बिल्डिङ प्रक्रियाबाट सेयर जारी गर्ने तयारी गरेका हुन्।
४० प्रतिशत बराबर सेयर जारी गर्न लागेका यी उद्योगले पहिलो चरणमा बुल बिल्डिङ प्रक्रियामा सहभागी हुनेहरूको लागि जारी गर्ने छन्। बुक बिल्डिङपछि यी कम्पनीको सेयर बिक्री मूल्य निर्धारण हुनेछ।
अन्य बाँकी तीनमा मुक्तिनाथ कृषि कम्पनीले चार करोड, घोराही सिमेन्टले तीन अर्ब ४४ करोड रुपैयाँ र सोनापुर मिल्सले एक अर्ब २३ करोड रूपैयाँ बराबरका सेयर जारी गर्ने भएको छ।
घोराही सिमेन्टले स्थानीयलाई प्रतिकित्ता चार सय रूपैयाँको दरमा र सर्वसाधारणलाई चार सय ३५ रूपैयाँको दरमा सेयर बिक्री गर्ने भएको छ।
सर्वोत्तम सिमेन्ट
प्रतिकित्ता पाँच सय एकदेखि सात सय ५१ तोकेर बुक बिल्डिङ प्रक्रियामा जान लागेको सर्वोत्तम सिमेन्टले ४० प्रतिशत सेयर बिक्री गर्ने योजना बनाएको छ।
क्लिङकर र ग्राइडिङमा वार्षिक १० लाख मेट्रिक टन उत्पादन क्षमता रहेको कम्पनीले आर्थिक वर्ष २०७७/७८ मा आठ अर्ब ९५ करोडको सञ्चालन आम्दानी गरेको छ।
कम्पनीले आर्थिक वर्ष २०७८/७९ को दोस्रो त्रैमासमा तीन अर्ब ८१ करोड रूपैयाँ आम्दानी गरेको प्राप्त पछिल्लो विवरणमा उल्लेख छ। उद्योगमा सौरभ समूहको प्रमुख लगानीकर्ताको रूपमा रहेको छ।
रिलायन्स स्पिनिङ
प्रतिकित्ता छ सय आठदेखि नौ सय १२ तोकेर बुक बिल्डिङ प्रक्रियामा जान लागेको रिलायन्स स्पिनिङले पनि ४० प्रतिशत सेयर बिक्री गर्ने योजना बनाएको छ।
कम्पनीको प्राप्त पछिल्लो तथ्यांक अनुसार आर्थिक वर्ष २०७७/७८ मा आठ अर्ब ९५ करोडको आम्दानी गरेको छ।
२५ वर्षदेखि धागो उत्पादन गर्दै आइरहेको यस कम्पनीको प्रवर्द्धन गोल्यान समूहदेखि एम एस समूहले गरेको छ। पवन कुमार गोल्यान अध्यक्ष रहेको यस कम्पनीले स्तरोन्नतिपछि वार्षिक चार हजार ६ सय ८० मेट्रिक टन उत्पादन गर्न सक्ने क्षमता भएको छ।
आर्थिक वर्ष २०७७/७८मा कम्पनीको उत्पादन बिक्री बढेर वार्षिक २८ हजार ६ सय ७० मेट्रिक टन पुगेको छ।
मुक्तिनाथ कृषि कम्पनी
प्रतिकित्ता एक सय रूपैयाँको दरमा सेयर बिक्री गर्ने तयारीमा रहेको मुक्तिनाथ कृषि कम्पनीको प्राप्त पछिल्लो तथ्यांक अनुसार आर्थिक वर्ष २०७७/७८ मा नौ करोड ८० लाख रूपैयाँ सञ्चालन आम्दानी गरेको छ।
मुक्तिनाथ विकास बैंकको मुख्य प्रवर्द्धनमा रहेको यस कम्पनीमा बैंकको २७.८ प्रतिशत सेयर स्वामित्व छ।
कम्पनीले समयमै मल उपलब्ध गराउन नसेको भन्दै राखेको नौ करोड २३ लाख रूपैयाँ धरौटी सरकारले रोक्का राखेको गत पुसमा भएको कम्पनीको रेटिङ विवरणमा उल्लेख छ।
यद्यपी यो कम्पनी यस क्षेत्रको ठूलो लगानीको कम्पनीको रूपमा रहेको छ।
घोराही सिमेन्ट
तीन अर्ब ४४ करोड रूपैयाँ बराबरको सेयर जारी गर्न लागेको घोराही सिमेन्टले स्थानीयलाई प्रतिकित्ता चार सय रूपैयाँको दरमा र सर्वसाधारणलाई चार सय ३५ रूपैयाँको दरमा सेयर बिक्री गर्ने योजना बनाएको छ।
स्तरोन्नतिसँगै यस उद्योगको प्रतिदिन तीन हजार मेट्रिक टन क्लिङकर उत्पादन र १४ सय ग्राइडिङ क्षमता भएको छ।
सन् २०२१ फेब्रुअरीबाट कम्पनीले उत्पादन सुरू गरेको हो। यस उद्योगको लागत आठ अर्ब ६६ करोडबाट बढेर १० अर्ब ४० करोड पुगेको छ।
कम्पनीको प्राप्त पछिल्लो तथ्यांक अनुसार आर्थिक वर्ष २०७७/७८ मा ६ अर्ब ९० करोड रूपैयाँ आम्दानी गरेको छ।
दक्षिण अफ्रिकाबाट कोइला ल्याएर सिमेन्ट उत्पादन गरिरहेको उद्योगले कच्चा पदार्थको रूपमा कोइलाको प्रयोग ५१ प्रतिशत बराबर हुने गरेको छ।
सोनापुर मिल्स
सोनापुर मिल्सले प्रतिकित्ता एक सय रूपैयाँ अंकित मूल्यको दरमा एक अर्ब २३ करोड रूपैयाँ बराबरका सेयर जारी गर्न लागेको छ।
उद्योग विस्तारमा रहेको यस कम्पनीको दैनिक क्लिङकर उत्पादन क्षमता एक हजार ६ सय ५० मेट्रिक टन र दुई हजार तीन सय मेट्रिक टन ग्राइडिङ पुग्नेछ।
कम्पनीको प्राप्त पछिल्लो तथ्यांक अनुसार आर्थिक वर्ष २०७७/७८ मा दुई अर्ब ९२ करोड रूपैयाँ सञ्चालन आम्दानी भएको छ।
कम्पनीको आम्दानीमा क्लिङकल बिक्रीबाट प्रापत आम्दानीको हिस्सा ४० प्रतिशत बराबर छ। उद्योगसँग दुई वटा चुनढुंगा खानी सञ्चालनको अनुमति छ।
