भूकम्पपछि बन्द भएको काठमाडौंको पाँचतारे होटल एभरेष्ट दसै अघि सञ्चालन हुने भएको छ। भूकम्पपछि रातो स्टिकल लगाएपछि बन्द भएको होटल मुद्दा मामिला र मजदुर व्यवस्थापन विवादले रोकिएको थियो।
गएको महिना श्रम समस्या समाधान भएपछि व्यवस्थापनले होटल पुन: सञ्चालनमा ल्याउने तयारी गरेको हो।
होटलमा कार्यरत मजदुरहरुले सेवा सुविधा निरन्तरताको माग गर्दै श्रम अदालत गएका थिए। उनीहरुले त्यहाँबाट जितेपछि व्यवस्थापनले अदालतमा मुद्दा दायर गरेको थियो। गएको फागुन १२ गते व्यवस्थापन र मजदुरबीच सहमति भएपछि व्यवस्थापनले आज मुद्दा फिर्ता लिएको थियो। सहमतिअनुसार व्यवस्थापनले होटल बन्द भएदेखिको तलब भत्ता उपलब्ध गराउने, तलबमा ५ प्रतिशत बृद्धि हुने भएको छ।
होटल सञ्चालनमा ल्याउन भन्दै व्यवस्थापनले कर्मचारी परिपूर्तिका लागि आव्हान गरिसकेको छ। होटलले जारी गरेको भ्याकेन्सीमा हजार भन्दा बढी आवेदन परेको र त्यसको सर्टलिस्ट गर्ने काम भइरहेको व्यवस्थापनमा रहेका नारयण पौडेलले जानकारी दिए।
होटलमा अहिले पूराना १ सय २८ जना मजदुर कर्मचारी कार्यरत छन्।
पौडेलका अनुसार होटल पूरानै क्षमतामा सञ्चालन हुने छ। होटलमा १६० कोठा रहेका छन्।