निजी क्षेत्रको हवाई सेवाप्रदायक सिता एयरले तराई तथा सुगम क्षेत्रका विमानस्थलमा उडान शुरु गर्ने तयारी गरेको छ। हाल पहाडी तथा हिमाली क्षेत्रमा उडान गरिरहेको एयरलाइन्सले सुगममा उडान शुरु गर्नका लागि तयारी अघि बढाएको हो।
एयरलाइन्स उच्च व्यवस्थापन स्रोतहरुका अनुसार हाल यसका लागि व्यावसायिक योजना बनिरहेको छ।
प्रारम्भिक अध्ययनअनुसार हामी एटिआर ७२-५०० सिरिजको जहाजबाट तराईका अधिकांस विमानस्थल तथा पोखरा उडान गर्ने निष्कर्षमा पुगेका छौं' एयरलाइन्स सम्बद्ध स्रोतले भन्यो' तर यसका लागि हामीले प्रशासनिक प्रक्रिया भने अघि बढाएका छैनौ।'
एयरलाइन्सले एटिआर ल्याएर धेरै यात्रुको चाप हुने विमानस्थलमा उडान गर्ने तयारी गरेको हो। नेपालीहरुको हवाई यात्रा गर्ने ट्रेन्ड बढेपछि ठूला एयरलाइन्स धमाधम जहाज थपमा लागिरहँदा पहाडी क्षेत्रमा केन्द्रित एयरलाइन्स सिताले पनि उक्त क्षेत्रमा नजर लगाएको हो।
हाल ड्रोनियरका ४ जहाजबाट पूर्वदेखि पश्चिमसम्मका पहाडी क्षेत्रमा उडान गरिरहेको एयरलाइन्सले एटिआर ल्याएपछि भैरहवा,नेपालगञ्ज,विराटनगरजस्ता विमानस्थलमा उडान गर्ने प्रारम्भिक योजना बनाएको छ।
एटिआरबाट उडान गर्ने हाल नेपालमा दुइवटा एयरलाइन्समात्र रहेका छन्। बुद्ध र यति एयरलाइन्सले अहिले एटिआरबाट उडान गरिरहेका छन्।
बुद्धसँग एटिआर ७२(७) र एटिआर ४२(3) सिरिजका कूल १० जहाज छन् भने यतिसँग एटिआर ७२ पाँचवटा छन्।