पछिल्लो एक वर्षमा फलफूलको मूल्य अकासिएको छ। उपत्यकाको सबैभन्दा ठुलो फलफूलको बिक्री केन्द्र कालिमाटी तरकारी बजारको तत्थ्याङक हेर्दा फलफूलको मूल्य औषतमा ३५.८९ प्रतिशतले बढेको देखिएको छ।
गत वर्ष अघि ११५ रुपैयाँ प्रतिकेजी रहेको स्याउ अहिले १४५ रुपैयाँ पुगेको छ। यस्तै, एक दर्जन केराको मूल्य ७५ बाट ३० रुपैयाँ बढेर १०५ पुगेको छ।
एक वर्षको अन्तरमा अनारको मूल्य सबैभन्दा बढी वृद्धि भएको छ। अघिल्लो वर्ष १६५ रुपैयाँ केजी पर्ने अनार अहिले १६० रुपैयाँ मूल्य बढेर ३२५ रुपैयाँ पुगेको कालिमाटी तरकारी बजारले जनाएको छ।
साही अवधिमा मौसमको मूल्य २५ रुपैयाँ बढेर १९०, भुँई कटहर १० रुपैयाँ बढेर १२५, लोकल नासपती २० रुपैयाँ बढेर ७५ रुपैयाँ प्रतिकेजी पुगेको छ भने काँक्रो प्रति गोटा २० रुपैयाँ मूल्य बढेको छ।
