नेपाल दाना, अण्डा, कुखुरा वितरक संघ केन्द्रीय समितिले अण्डाको नयाँ खुद्रा मूल्य कायम गरेको छ।
संघले आज काठमाडौँमा आयोजना गरेको बृहत अन्तरक्रिया कार्यक्रममार्फत किसान र व्यवसायी बीचको सहमतिपछि नयाँ मूल्य कायम गरेको हो । नयाँ मूल्य अनुसार अबदेखि उपभोक्ताले प्रतिगोटा १२ रुपैयाँमा अण्डा पाउनेछन्।
आज कायम भएको नयाँ मूल्य अनुसार बिक्री वितरण नगर्नेलाई कार्वाही गर्ने संघले जनाएको छ। तोकिएको मूल्य लागू गर्न व्यवसायीको तर्फबाट सूर्यमान शाक्य र किसानको तर्फबाट पिताम्बर सञ्जेलको संयोजकत्वमा अलग अलग ७÷७ सदस्यीय समिति गठन गरिएको छ।
किसानले लामो समयदेखि अण्डाको रेट नपाएको अवस्थामा संघले काठमाडौँमा आम उत्पादक, सप्लायर्ससहित भेला गरी नयाँ मूल्य तोकेको अध्यक्ष तेजनारायण पाण्डेले बताए। संघकै पहलमा तोकिएको यो मूल्यले किसानले वास्तविक मूल्य पाउनेमा कुनै शंका नरहेको पाण्डेले बताए।
नेपाल पोल्ट्री महासंघका उपाध्यक्ष अर्जुन अर्यालले आफै अग्रसर भएर मूल्य वृद्धि गरिएको र यसलाई कार्यान्वयन गर्न सबै पक्ष लाग्नुपर्नेमा जोड दिए।
यसअघि भदौ ३१ गते संघले चितवनमा देशव्यापी रुपमा उत्पादक, सप्लार्यस, वितरकहरुको भेला राखी प्रतिक्रेट २२० रुपैयाँमा घटेको अण्डाको मूल्यलाई वृद्धि गरी २५० किसान रेट कायम गरेको थियो।
काठमाडौंका किसानले पाउने रेट भने २ सय ६५ रुपैयाँ प्रति क्रेट हुन जानेछ।