विश्व पर्यटन दिवसको अवसरमा सरकारले पर्यटन क्षेत्रका कार्यरत संस्थाहरुलाई सम्मान गरेको छ। पर्यटन विभागले उत्कृष्ट प्रदर्शन गर्ने संस्थाहरुलाई सम्मान गरेको छ।
यात्रु संख्या,कर, आरोहीको संख्या, रोजगारी सिर्जना, सामाजिक उत्तरदायित्व जस्ता क्षेत्रमा राम्रो प्रदर्शन गरेका कम्पनीलाई विभागले पुरस्कारसहित सम्मान गरेको हो।
विभागले धेरै पर्यटक ल्याउने कतर एयरवेजलाई सम्मान गरेको छ। एयरवेजले गएको वर्ष ३ लाख ९९ हजार यात्रु ल्याएको थियो। त्यस्तै धेरै विदेशी मुद्रा आर्जन गर्ने फ्लाइट कनेक्सन डोमेस्टिक प्रालीलाई सम्मान गरेको छ।
पर्यटन गन्तव्य प्रवर्द्धन गरेको भन्दै कालिञ्चोक दर्शन प्राली सम्मानित भएको छ। त्यस्तै धेरै रोजगारी सिर्जना गर्ने सोल्टी होटल सम्मानित भएको छ। त्यस्तै फरक क्षमता भएकाहरुलाई रोजगारी दिने द बेकरी क्याफेलाई पनि विभागले सम्मान गरेको छ।
समाजिक उत्तरदायित्व निभाउने फिस्टेल लज, सबैभन्दा बढी कर तिर्ने बुद्ध एयर, सामुदायिक होमस्टे नाम्जेथुम्की सामुदायिक होमस्टे र धेरै पर्वतारोही ल्याउने सेभेन समिट ट्रेक्सलाई सम्मान गरेको छ।
