नेपालबाट अन्तर्राष्ट्रिय उडान गर्ने हिमालय एयरलाइन्सबाट विदेशी लगानी फिर्ता हुने भएको छ। नेपालको यति वर्ल्डसँगको सहकार्यमा खुलेको हिमालय एयरलायन्सबाट चिनियाँ लगानी फिर्ता हुने प्रक्रिया सुरु भएको स्रोतले जानकारी दियो।
हिमालयमा चीनको तीब्बत एयरलाइन्सको ४९ प्रतशत लगानी रहेको थियो।
'४९ प्रतिशत लगानी साझेदार भएको तिब्बत एयरलाइन्स फिर्ता हुने करिब निश्चित भएको छ। यसका लागि प्रक्रियागत सुरुवात भइसकेको छ' उच्च स्रोतले भन्यो।
सन् २०१४ अगस्टमा स्थापना भएको उक्त एयरलाइन्सले काठमाडौंबाट युयईको दुबई र आबुधावी, साउदीको दमाम, कतारको दोहा, मलेसिसयाको क्वालालम्पुर र बंगलादेशको ढाकामा उडान गरिरहेको छ।
८ प्रिमियम इकोनोमी क्लास र १५० इकोनोमी क्लास सीट भएका ए३२०–२१४ सिरिजका ३ वटा न्यारो–बडी जहाज भएको एयराइन्सले एउटा जहाज भने भाडामा दिएको छ।
यही वर्ष जहाज थप गरी चीको बेइजिङ, नाङचाङ, चोङकिङ, चाङ्सा, गुइयाङ लगायतका सहरमा पनि उडान विस्तार गर्ने लक्ष्य लिएको एयरलाइन्सको लगानीकर्ताबाट तिब्बत एयरलाइन्स भने बाहिरिएको छ।
चिनियाँ लगानी भएकै कारण भारतले उडान अनुमति दिन आनाकानी गर्दै आएको थियो। कागजी रुपमा नेपाली साझेदार भएपछि बहुमत स्वामित्व चिनियाँ पक्षको भएको भन्दै भारतीय अधिकारीहरुले हिमालयलाई नयाँ दिल्ली उडान अनुमति दिएका थिएनन्।