नेपालको अग्रणी वायुसेवा कम्पनी यती एयरलाइन्सले सञ्चालनको २१ वर्ष पूरा गरेको छ । एयरलाइन्सले सञ्चालनको २ दशक सफलतापूर्वक पार गरेको बताएको छ।
सन् १९९८ सेप्टेम्बर २१ देखि सुरु एयरलाइन्सले देशका २१ विमानस्थलमा उडान गर्दै आएको छ।
नियमित रुपमा सञ्चालनमा रहेका ३३ मध्ये यति र तारा एयरलाइन्सले दैनिक २१ विमानस्थलमा उडान गर्छन्। दुर्गम क्षेत्रमा उडान गर्नका लागि स्थापना भएको यतिको भगिनी संस्था तारा एयरले पनि नियमित सेवा दिइरहेको छ।
माउण्टेन फ्लाइटसहित यतीले दैनिक नेपालका ठूला शहर मात्र नभई अति दुर्गम कर्णालीसम्म उडान सेवा प्रदान गर्दै आएको छ । दुई दशकको सेवामा यती व्यवसायमुखी मात्र नभई सामाजिक सेवामुखी हवाई कम्पनीको रुपमा पनि अग्रस्थानमा रहेको यतिका प्रमुख कार्यकारी उमेशचन्द्र राईले बताए।
कम्पनी २१ वर्ष पूरा गरी २२ वर्षमा प्रवेश गरेको अवसरमा नयाँ प्रविधि जडित र सुविधायुक्त जहाज थप गरी सेवा विस्तार गर्ने लक्ष्य राखेको प्रमुख कार्यकारी राईले बताए ।
राईका अनुसार रुकुमको सल्ले, चौरजहारी, साँफेबगर, बझाङ, डोटी, रुम्जाटार, खानीडाँडा, लामीडाँडा, भोजपुर, सुकेटार, जोमसोम, काँगेल जस्ता दुर्गम र अत्यावश्यक क्षेत्रमा पुनःसेवा सुचारु गर्ने एयरलाइन्सको लक्ष्य छ।
नेपालको पहिलो र एकमात्र कार्वन न्युट्रल कम्पनी एअरलाइन्सले व्यवसायसँगै विभिन्न किसिमका सामाजिक कार्यहरु समानान्तर रुपले निरन्तर गर्दै आइरहेको छ ।
सामाजिक कार्यहरुमा एयरलाइन्सको सगरमाथा सफाई कार्यक्रम एक हो। यसले स्थानीय सरकार तथा सगरमाथा प्रदूषण नियन्त्रण समितिसँगको सहकार्यमा सगरमाथा सफाई अभियानमा यती र भगिनी संस्था तारा एयरले सन् २००८ देखि शुरु गरेका हुन्।
२००८ देखि २०१८ सम्म ७५ टन फोहोर काठमाडौं ल्याइएको र २०१९ को अन्तिमसम्म थप ३० टन फोहोर संकलन गर्ने लक्ष्य कम्पनीको छ।
यती एयरलाइन्स वातावरण संरक्षणका लागि विभिन्न संस्थाहरुसँग सहकार्य गरिरहेको छ।
यती नेपालमा कार्वन न्युट्रल अभियान शुरुवात गर्ने पहिलो र एकमात्र हवाई कम्पनी हो । कार्वन उत्सर्जन कम गर्न इन्धन बढी खपत गर्ने विमानलाई विस्थापित गरी कम इन्धनमा चल्ने जहाज खरिद गरी सेवा विस्तार गरेको छ ।
विगत दुई वर्ष भित्रै कम्पनीले ५ वटा एटिआर विमान खरिद गरी देशका मुख्य शहरहरुमा सेवा थप गरेको छ । त्यस्तै एअरपोर्टमा यात्रुलाई जहाजसम्म ल्याउने/पुर्याउने सुविधाका लागि प्रयोग हुने सवारी साधनको सन्दर्भमा पनि विद्युतीय भ्यानको प्रयोग सुरु गरेको छ र डिजेल तथा पेट्रोलबाट सञ्चालन हुने सबै सवारी साधनहरुलाई बिस्तारै विस्थापित गर्दै विद्युतीय सवारी थप गर्ने तर्फ कम्पनी अघि बढेको छ ।
यतीले प्रयोगमा ल्याइएका जहाज तथा सवारी साधनबाट भएको उत्सर्जित कार्वनको राष्ट्र संघबाट सम्बन्धन प्राप्त संस्थाबाट अडिट गराई क्षतिपूर्ति गर्दै आइरहेको छ । साथै यती एअरलाइन्सले विगत १० वर्षदेखि विभिन्न संघसंस्थाहरुको सहकार्यमा कैलाली, कञ्चनपुर, डोटी र सोलुखुम्बु क्षेत्रमा २ लाख ८० हजारभन्दा बढी वृक्षारोपण समेत गरेको छ ।
यती एयरलाइन्सले सहस्राब्दी दीगो विकास लक्ष्य पूरा गर्न संयुक्त राष्ट्र संघ विकास नियोग (युएनडिपि) सँग सहकार्य गरिरहेको छ । दीगो विकास लक्ष्यका १७ वटा बुँदामध्ये यतीले बुँदा नम्बर ५ को जेन्डर इक्वालिटी, १३ नम्बर बुँदाको क्लाइमेट एक्सन र १७ को बुँदाको पार्टनरसिप टु अचिभ दि गोल गरी ३ वटा बुँदामा सहकार्य गरी कामहरु अघि बढाएको छ । यतीका प्रत्येक जहाज, सवारीसाधन र प्रचार सामग्रीमा दीगो विकास लक्ष्यको लोगो राख्ने गरिएको छ ।
यती र यसको भातृ संस्था तारा एयरले दुर्गम क्षेत्रमा हवाई सेवा प्रदान गरी दुर्गममुखी हवाई सेवा कम्पनीको रुपमा पनि चिनिएको प्रमुख कार्यकारी राईको भनाइ छ।
सुविधा सम्पन्न क्षेत्रमा ५ वटा जेटस्ट्रीम र ५ एटिआरले उडान गर्दै आएको यतिले बाँकी दुर्गम क्षेत्रमा तारा एयरका ४ ट्वीनअटर र २ डोर्नियर जहाजले उडान गर्दै आएका छन्। अन्य एयरलाइन्सले पर्यटकको चाप बढ्ने सिजनमा मात्र सेवा दिने तर अफसिजनमा सेवा बन्द गर्ने गरेको भए पनि ताराले बाह्रै महिना सबै ठाउँमा सेवा दिने गरेको राईको भनाइ छ।
ताराले लुक्ला, जोमसोम, सिमिकोट, रारा, डोल्पा, जुम्ला, फाप्लु, बाजुरा लगायतका स्थानहरुमा नियमित उडान गर्दै आएको छ।
तारा एयरले मात्र यस वर्ष लुक्लामा ५६ हजार ५६, जोमसोममा ३२ हजार ६ सय ४८, सिमिकोटमा १७ हजार ४ सय ७५, रारामा १४ हजार ९ सय ४२, डोल्पामा ११ हजार २ सय ७०, जुम्लामा ६ हजार ६ सय ८४, फाप्लुमा ३ हजार ६ सय २८ र बाजुरामा १ हजार १८ जना गरी एक लाख ४३ हजार ७ सय २१ यात्रुलाई सेवा दिएको छ।
दुर्गम क्षेत्रको समस्यालाई मनन गरेर एयरलाइन्सले बैकल्पि सेवासमेत दिने गरेको राईले बताए।
'विमानस्थल कालोपत्रे गर्ने क्रममा लुक्ला विमानस्थल बन्द हुँदा अन्य विकल्प थिएन तर तारा एयरले पर्यटक तथा स्थानीयहरुलाई काठमाडौंबाट लामिडाँडा र फाप्लुसम्म जहाजमा पुर्याई त्यहाँबाट हेलिकप्टरबाट खुम्बु पुर्याइएको थियो' राईले भने।
एयरलायन्सले आफ्नो प्रत्येक उडानमा शारीरिक रुपमा अशक्तलाई हवाई भाडामा ५० प्रतिशत तथा ६५ वर्षभन्दा माथिका ज्येष्ठ नागरिकलाई २५ प्रतिशत छुट दिँदै आइरहेको छ ।