भारतले प्याज निर्यातमा प्रतिबन्ध लगाएपछि व्यापारीले लुकाउन थालेका छन्। सोमबार वाणिज्य विभागले कालिमाटी फलफुल तथा तरकारी बजारमा गरेको अनुगमनमा व्यापारीले प्याज लुकाएको भेटिएको हो।
कालिमाटी बजारको अर्याल आलु प्याज सप्लार्यसले प्याजको गोदाम देखाउन नमानेको अनुगमनमा खटिएका निरीक्षण अधिकृत रमेशकाजी श्रेष्ठले जानकारी दिए।
‘हामीले प्याज कति स्टक छ देखाउनुभन्दा त्यहाँको व्यापारीले देखाउन मानेन्ु’, उनले सेृतोपाटीसँग भने, ‘पछि हामीले गोदाम अनुगमन गर्दा २ सय बोरा प्याज स्टक रहकको पायौं।’
उनका अनुसार पहिले १ सय ५० बोरा मात्र प्याज स्टक रहको व्यापारीले बताएका थिए। पछि गोदाम अनुगमन गर्दा २ सय बोरा प्याज भेटिएपछि २४ घण्टाभित्र व्यापारीलाई विभागमा आउन निर्देशन दिइएको छ।
भारतले प्याज निर्यातमा प्रतिबन्ध लगाएपछि एकैदिनमा प्याजको मूल्य प्रतिकेजी ३० रूपैयाँले बढेको कालिमाटीको तथ्याङ्कले दखाएको छ।
प्याजको मूल्य एक्कासी ह्वात्तै बढेपछि विभागले अनुगमन गरेको हो।
अनुगमनका लागि ४ वटा टोलि खटिएको थियो। टोलीले ८ वटा पसलमा अनुगमन गरेको थियो। अनुगमनगर्दा खरिद र बिक्री मूल्यमा धेरै अन्तर नभएको निरीक्षण अधिकृत श्रेष्ठले बताए।
‘बिल–बिजक हेर्दा खरिद र बिक्री मूल्य धेरै अन्तर पाइएन। व्यापारीले प्रतिकेजी १ सय ७ लिएर १ सय १०/१२ बेचेको पाइयो’, उनले भने।