नेपाल निर्माण व्यवसायी महासंघले २२ सय ठेक्काको म्याद थपको माग गर्दै प्रधानमन्त्री निवास बालुवाटार घेराउ गरेका छन्। ठेकेदारहरुले म्याद थप नभएकै कारण आफूहरुले निर्माण गर्ने जिम्मा पाएका २ सय अर्बका आयोजना अलपत्र परेको जनाएका छन्। सार्वजनिक खरिद नियमावली, २०७६’ को आठौं संशोधनमा समेत उनीहरुको आपत्ती छ।
महासंघले सोमबार बिहान बालुवाटारस्थित प्रधानमन्त्री निवास अगाडि साढे नौ बजे देखि एकघण्टा धर्ना दिएको हो। हातमा कालो पट्टि बाँधेर धर्नामा बसेका निर्माण व्यवसायीहरुले विकास आयोजनाहरुको म्याद थप, बैंक, ठेक्काको मुल्य बढाउन(भेरिएसन)को काम छिटो गर्न माग गरेका हुन्।
महासंघका अध्यक्ष रबी सिंहले सो नियमावली संशोधन गर्ने प्रधानमन्त्री केपी शर्मा ओलीले जनाएको प्रतिवद्धता ४ महिना पूरा हुँदा पनि कार्यान्वयनमा नआएकाले आन्दोलनमा जानु परेको बताए। उनले आफूहरुको सो माग पूरा नभए विकास, निर्माणका कामहरु ठप्प हुने चेतावनी पनि दिए।
महासंघले नियमावली संशोधन नभए दोस्रो चरण अन्तर्गत माइतीघर मण्डलामा कालोझण्डा सहित प्रदर्शन गर्ने, आयोजनाको इजाजतपत्र सरकारलाई बुझाउने, ठूला इक्युप्मेन्टलाई सडकमा प्रदर्शन गर्ने, टेण्डर बहिस्कार गर्ने, विकास निर्माणका कार्यहरु पूर्णरुपमा ठप्प पार्ने लगायतका कार्यक्रमहरु सार्वजनिक गरिसकेको छ।