दराजले सन् २०१२ मा स्थापना भएदेखि नै अनलाइन बजारमा आफ्नो छाप छोड्दै आएको छ।
२०१८ मा अलिबाबाले दराज अधिग्रहण गरेको हो। हाल यो पाकिस्तान, बंगलादेश, नेपाल, श्रीलंका र म्यानमारमा पनि उपस्थित छ। दराजले २०१९ कम्पनीका लागि सफल वर्ष बनेको दावी गर्दै २०२० का लागि योजना बनाएको छ।
एपलाई २०१९ मा थप सुधार गरेर ग्राहक संख्या बढाइएको कम्पनीले जनाएको छ। सन् २०१८ को तुलनामा कम्पनीले ग्राहक तथा विक्रेता संख्यामा २ सय प्रतिशत र अर्डरमा २ सय ७० प्रतिशतले बृद्धि गरेको दावी गरेको छ।
२०१९मा भएको दराज ११.११ को दोस्रो संस्करणले मात्रै ३.५ लाखभन्दा बढी प्रयोगकर्ताहरू दर्ता भएको कम्पनीले जनाएको छ। जुन २०१८ को ११.११ को तुलनामा दुई गुणा बढी हो।
२०१९ मा दराजले डेबिट र क्रेडिट कार्डद्वारा भुक्तानी सेवा थाल्यो। कम्पनीले वास्तविक समयमा विक्रेतासँग प्रत्यक्ष कुराकानी गर्न मिल्ने इन्स्टन्ट म्यासेजिङ सुविधा पनि थप्यो।
पूर्वाधारमा लगानी गर्दै दराज एक्स्प्रेस (डेक्स) नामक ‘लजिस्टीक्स’ इकाई पनि स्थापना गर्यो। साथै तीन सयभन्दा बढी कर्मचारीहरू २०१९ मा थप्यो। २०१९ मा सामसङ, क्यासियो, एडिडास, टाइटन, सियाउमी, सोनमगियर्स, टिभिएस लगायत ब्रान्ड दराजमा सामेल भए।
दाराज एपले दैनिक १ लाखभन्दा बढी प्रयोगकर्ताहरू होस्ट गर्ने गरेको र हरेक महिना १.६ लाख प्याकेजहरू नेपालभर वितरण हुने गरेको कम्पनीको दावी छ।
नेपालमा मात्र दराजले तीन हजार भन्दा बढी विक्रेताका लाखौं उत्पादन ग्राहकसमक्ष पुर्याउँदै आएको छ। कम्पनीले २०२० मा अझै धेरै दराज प्रयोगकर्ता र विक्रेताहरू संलग्न गर्ने लक्ष्य राखेको छ। यससका लागि कम्पनीले लजिस्टिक इकोसिस्टमलाई सुधार्ने तथा देशभरी नेटवर्क बढाई विक्रेताहरुलाई दराजमा व्यापार गर्ने मौका दिने जनाएको छ।
डेलिभरी लोकेसन थप्ने योजना कम्पनीले बनाएको छ। दराजले २०२० मा ग्राहकका लागि डिजिटल वालेट र अधिक मनोरन्जन सुविधाहरू प्रस्तुत गर्ने जनाएको छ।
‘दराजले छोटो समयको अवधिमा अत्याधिक प्रगति देखेको छ, तर यो आलोचना र ट्रोलबाट मुक्त छैन।’ दराज प्रबन्ध निर्देशक लिनो अलरिन्गले भने।
‘हामी निरन्तर विक्रेता, ग्राहक अनुभव, ग्राहक सेवा र पूर्वाधारलाई अझै राम्रो कसरी बनाउन सकिन्छ भनेर हेर्दछौं। हामी जहिले पनिअझ राम्रो के गर्न सक्दछौं भनेर फर्केर हेर्दछौं’ उनले भने ‘यो मानसिकताले गर्दा हामीले पहिलो ११.११ को तुलनामा यसपटक दोब्बर सफलता हासिल गर्यौं हामी अझै प्रारम्भिक चरणमा छौं, र हामीले धेरै सिक्नु आवश्यक छ। हामी आफैंमा सुधार लिएर आउन ग्राहकको प्रतिक्रिया र आलोचनाहरू प्रति भर पर्छौं।’